Shillong, Iaiong 13: Ka Voice of the People Party kala pynbna ba kan pynlong ïa bun tylli ki jingïalang paidbah halor ka jingpyntreikam ia ka Roster System ka ban sdang naduh ka 17 tarik Iaiong.
U Nongaiktien ka VPP u Dr. Batskhem Myrboh ula pyntip ba ka VPP ha ka kylla ba nyngkong kan pynlong ïa ki lai tylli ki jingialang paidbah, kata ha ka 17 tarik u Iaiong ha Madanheh Mawlai haka por 2 baje nohphai sngi, haka 19 tarik ha Iamusiang Jowai ha ka por 12 baje mynsngi bad ha ka 20 tarik ha Jaiaw ha ka por 2 baje mynsngi.
U Bah Myrboh ula pynpaw ba ka seng ka hap ban shim ïa kane ka lynti ban pynlong da ki jingïalang paidbah dei namar ka jingleh bym suidñiew jong ka sorkar MDA 2.0 ïaka jingkyrpad jong ka seng ban pynlong ia ka dorbar ba kyrpang jongka Meghalaya Legislative Assembly ban iathir ia kane ka mat ba donkam eh.
“Ka jingkuman jong kane ka sorkar ka pynpaw shynna ïa ka jingbym salia ïa ka jingshah ktah jur ki samla Khasi-Jaintia bad ki samla ba don jingduna ha ka dkhot met. Ka jingbym khot ïaka dorbar kyrpang ka long kumba ñiew dewthala ïa ka Iing Dorbar Thawaiñ, kaba dei ka jaka ban ïakren ïa ki mat ki jura kiba ktah ïa ki paidbah da ki nongmihkhmat ba la jied hi da ki paidbah” ula bynrap.
U Nongaiktien ula pynpaw ba dei halor kitei ki daw ba la kdew haneng, ka VPP ka hap ban pynlong noh da ki jingïalang shabar ka Iing Dorbar Thawaiñ bad ula kyrpad iaki paidbah ban ia mih ryntihlang ban wan ban sngap ïa ka jingpynshai ki nongïalam jongka Party halor kane ka bynta.
Pule lang ia kane: Maham ka HYC ban mih ka jingjia kum ha ka jingiakhih MBoSE lada bakla halor ka Roster System
