Shillong, Iaiong 13 : Ka Iingkashari Meghalaya High Court kala rai ban nym tuklar ia ka hukum jong ka Iingkashari District kaba hukum ban set haduh 25 snem ia u MLA barim ka Mawhati Bah Julius Dorphang namar ka jingle beijot ia ka Khynnah rit haba bthah ruh ba dei ban siew bailutksan ia kane ka Khynnah haduh T. 20 lak.
“Ka por ban set along ba 25 snem bala ai da ka Iingkashari District halor ki daw kiba ieng, kam dei satia ka kam ban hap tuklar” ong ka Division Bench bala khlieh da u Chief Justice Sanjib Banerjee ha ka hukum haba pynwai ia ka jingkyrpad (appeal) jong u Bah Dorphang pyrshah ia ka hukum.
Ka Iingkashari ka ong ba haba shim jingkhein ia ka snem jong une u nongleh bymman, ka por sajia kalah ban long 15 snem lane 20 snem lane 30 snem ne hapdeng kine ki snem.
U Bah Julius ula iakhun pyrshah ia ka hukum ba 24 tarik Nailar 2021, bala pynmih da ka Iingkasahri Special Judge (POCSO) ka Ri-Bhoi District, kaba hukum ban set along ia u haduh 25 snem.
Ha kajuh ka por, ka Iingkashari kala hukum ia ka Sorkar Jylla ban pynthikna ha kaban iai khmih ia ka bha ka miat jong ka lanot, la kumno kumno ruh tad haduh ba kan da kynjoh ia ka rta ba 25 snem.
“Ka kuna lada lah siew, bad ka song pisa baroh kum ka bailutksan kam dei ban duna ia ka T. 20 lak, dei ban ai da ka Sorkar Jylla sha ka lanot da kaba kynshew kat haduh ba kan da biang ka rta ba kan ioh pdiang ia ka. Ha kawei pat ka kyntiew, ka Jylla kan siew ruh sa T. 5 lak sha ka lanot kum ka bai lutksan nalor ka song pisa ba T. 15 lak ba ka ioh na ka kuna. Ka Iing kasahri ka ong ruh ba lada u nongleh bymman um siew satia ia ka pisa, un hap ban shong along sa 5 snem kynthoh.
Ka hukum ka ong ruh ba ka Sorkar Jylla kan hap ban shim ia ka jingbahkhlieh ha ka ban pynlut ia baroh ki bai sumar jong ka lanot kaban iaryngkat ha ka kyrdan jong ka Grade-II officer ka Jylla na ka bynta kine ki 20 snem ban wan.
Pule lang ia kane: Maham ka HYC ban mih ka jingjia kum ha ka jingiakhih MBoSE lada bakla halor ka Roster System
