Dibrugarh, Iaiong11: U Myntri kam pohiing ka sorkar pdeng u Amit Shah hynne ka sngi u la pynkut ia ka jingleit jurip ba arsngi sha ka thain Northeast da kaba pynlong ka jingleit sha Dibrugarh, Assam ban ia don bynta ha ka jingialang buh mawnongrim na ka bynta ka jingtei ia ka ophis treikam bathymmai jong ka seng BJP bad aijingkren ruh ha ka rally ha kaba u la ong ba ha ka ilekshon Lok Sabha 2024, ka BJP kan jop haduh kumba 300 seat bad u Myntri Rangbahduh (PM) Narendra Modi un thaw ia ka sorkar ha ka sien kaba lai kynthih.
“Nga kwah ban pyntip ia ka Congress ha ha ka ilekshon Lok Sabha 2024, na ki 14 tylli ki seat ha Assam, ka BJP kan jop 12 bad hapoh ka ri baroh kawei ka BJP kan jop palat ia ka 300 seat bad u Modi un thaw biang ia ka sorkar ha ka sien kaba lai kynthih,” ong u Shah.
U Shah u la kynthoh ruh ia u Rahul Gandhi sa shisien pat da kaba ong; “U Rahul Gandhi u la leit sha ri nongwei bad leh bym salia eh ha kaba iadei bad kane ka ri.Ka dang don ka por na ka bynta u Rahul Gandhi lada um pynkylla noh ia ki jinglong ki jong u, kata kumba ka seng Congress ka la shah sar na ka thain Northeast, hapoh ka ri baroh kawei ruh kan wan jia kumjuh.Ka Congress ka la ong u Modi ula jan sha ka jingtep..shah ba Ngan ong ha ki…ki 120 klur ki briew ki duwai miet bad sngi na ka bynta ka jingim kaba jlan jong u Modi.Katta phi nang kynthoh ia u Modi, u syntiew lotus un nang phuh bad kham phyrnai shuh shuh.”
Ha ka juh ka por u Amit Shah u la pyrto bad ai khublei ia baroh ki nongtrei jong ka party hapoh ka thain Northeast.
“Ha ka ilekshon ha ki laitylli ki jylla ka thain Northeast ngi la lah ban ioh ia ka jingjop..ngi la don bynta ha ka sorkar; ha baroh ki phra tylli ki jylla ka thain northeast ngi don ia ka sorkar NDA. Dei namar ka sorkar jong u Modiji la weng noh haduh kumba 70 percent ia ka ain AFSPA na ki bynta jong ka Assam, ka jingsuk ka la wan ha ka thain Bodoland, wat ha Karbi Anglong ka la don ka jingsuk.Ia ki jingiakajia pud hapdeng ka Assam bad kiwei pat ki jylla ka thain Northeast la lah ban weng noh,” ong shuh shuh une u myntri ka sorkar pdeng.
