Shillong, Iaiong 11 : Ka Khun Hynniewtrep National Awakening Movement (KHNAM) hynne ka sngi Ba-ar, kala pynpaw ba ka jingiakren ia ka roster system tang ha ka Kynhun Myntri kan nym lah ban pynbeit lane ai jingshai ia ka jingeh haba dawa ruh ba dei ban pynsangeh shuwa ia baroh ki jingthungkam tad haduh da don ia ka roster kaba paka ha Jylla.
Kane ka jingdawa kala mih hadien shisngi ba u Symbud Myntri Rangbah ka Jylla Bah Prestone Tynsong ula pyntip ba ka Sorkar Meghalaya Democratic Alliance kan sa shong iakren shen bad ban shim rai halor ka kam ba iadei bad ka roster system ha ka jingialang ban wan jong ka Kynhun Myntri.
U Bah Prestone ula pyntip ruh ba ka Sorkar ka lah ruh ban iakren ia kane ka kam ha ka jingialang ka MDA bad jong baroh ki seng sain pyrthei ka Jylla.
Pule lang ia kane: Kem ki Pulit ka Ri Bhoi ia arngut ki Nongkhaii ganja
Ha ka kyrwoh u Vice President ka KHNAM Bah Thomas Passah ula ong ba ka jingkren jong u Symbud Myntri Rangbah halor ka roster system kam i don jingkyrmen satia.
“Ngi kwah ban pynpaw ba ka jingiakren ia ka roster system tang ka Kynhun Myntri kan ym lah pynbeit ne ai jingshai ia ka jingeh. Ka sienjam ba ka Sorkar a thmu ban shim halor kane ka kam, ba kynthup ia ka jingialang ka Kynhun Myntri, ka jingialang jong ka MDA bad ka jingialang ki seng sain pyrthei kumba pynpaw da u DyCM ka dei tang ka buit ban thied por ha kawei ka liang bad ha kawei pat ka liang ki dang pynsted ia ka jingthungkam ha ki tnad bapher bapher ban pynmyntoi tang ia kawei ka Jaidbynriew na kane ka roster system ba mynta kaba long be-ain” ula ong.
“Dang mynta katno, ngi lah iohi ba ki don shibun ki jingpynbna bala mih ban thungkam ha ki tnad bapher bapher jong ka Sorkar, kila don ruh ki khep ba ia ki kam ba lait la pynmih jingpynbna biang kat kum ka bhah lyngba ka roster system, ha kaba bun ka kam ba lait (seat) la ai sha ki Garo bad khyndiat ki kam ba lait (seat) la ai sha ki Khasi bad Jaintia” kynnoh u Bah Passah.
Haba dawa ia ka Sorkar ban pynsangeh shuwa ia ka jingthungkam barih, une u Nongialam ka KHNAM ula ong, “Namar kata, lada ka Sorkar ka sngewkhia shisha ngi dawa ba baroh ki jingthungkam dei ban pynsangeh shuwa, tad haduh ba ngin da ioh ia ka roster system kaba paka”.
Pule lang ia kane: Khang ka KHADC ia ki Rangbah Shnong, Myntri bad Sordar ban iadonbynta ha ka kam sain pyrthei
