Shillong, Iaiong 11 : Ka seng Hynniewtrep National Liberation Council (HNLC) kala buh mynta ia ki kyndon ban pynbteng ia ka jingiakren iasuk bad ka Sorkar ba kynthup ia ka kam ba iadei bad ka Instrument of Accession (IOA) bad ka Annexed Agreement (AA).
U Nongmihkhmat ka HNLC bad President ka Hynniewtrep National Youth Front (HNYF) Bah Sadon K Blah haba pyntip ia kane hynne ka sngi ba-ar, ula ong “Ngim lah ban ong ba ka jingiakren kan dei kaba khlem ka jingbuh kyndon namar ki don ki kyndon kiba ngi la buh hakhmat”.
“Ki jingkren hi kim lah ban long 100% ba khlem kyndon namar lada dei kaba khlem jingbuh kyndon, ngim donkam shuh ban iakren. Ki don ki mat kum ki kam synshar khaddar bad kiwei kiwei ki kam kiba iadei bad ki nongrim jong ka HNLC kiba la don mynta la 35-37 snem ba hap ban iakren” ula bynrap.
U Bah Sadon ula ong ruh ba ka kam ba iadei bad ka Instrument of Accession (IOA) bad ka Annexed Agreement (AA) ruh ka dei shibynta jong ka jingiakren.
Haba pyntip ba ka jingiakren ba thikna kam pat sdang satia, u Bah Sadon ula ong “Ka jingiakren para ma ngi (unofficial) ka dang iaid shaid shaid hynrei ka jingiakren ba thikna (official) halor ki mat kam pat sdang satia. Kine ki kam kiba ngi dang iapyrshang ban pynbeit mynta ban lah pyniaid noh ia ka jingiakren ba thikna”.
Une u Nongmihkhmat ka HNLC ula pynpaw ba um lah satia ban batai ia kiei ki mat iakren jong ka HNLC namar ia kane un sa wanrah hadien bala sdang ka jingiakren kaba thikna bad ka Sorkar.
Haba kylli, u bah Sadon ula banjur ba ka jingmap noh (amnesty) ia ki kam pyntriem kiba rim, ka dei kaba donkam khnang ban lah pyniaid shakhmat ia ka jingiakren iasuk.
“…Kino kino ki kam bymman ba iadei bad kine ki kynhun kiengatiar ha India ne kiwei kiwei ki bynta jong ka Pyrthei bad ha ka thain Shatei Lam Mihngi ruh, ka jingweng noh ia ki kam bymman ka dei kaba kongsan bha hapoh ka jingmap noh” ula ong haba pyntip ba ki arliang mamla kim pat iakren satia halor kane ka jingmap noh ha kano kano ka kyrdan bad shisien ba la sdang ka jingiakren ba thikna “Ngin sa iakren ia kine ki kam bymman namar ka jingmap noh ka dei kaba kongsan”.
Haba pynpaw ruh ba kam don satia kano kano ka diengpynkiang ha ka lynti jong ka jingiakren iasuk, une u Nongmihkhmat ka HNLC ula ong ba ka Sorkar India bad ka Sorkar Jylla kila kut jingmut ban sdang noh khamkloi kat kaba lah ia ka jingiakren iasuk.
“Ka Sorkar kala dep ai ia ka lynti iaid ba shngain ia ki Nongialam ka HNLC kiban iadon bynta ha ka jingiakren iasuk” ula pyntip.
Halor kawei pat ka jingkylli, u Bah Sadon ula ong “U Nongialam barim ka HNLC (L) Cheristerfield Thangkhiew um shym la don bynta satia ha ka jingiakren iasuk ha kato ka por bad kaba ar ba um dei ruh uba wan pyndemwait, hynrei u dei uba shongthait na ka HNLC bad kam shonghok ia u ban kam ia ka song jingiarap naba u khlem wan pyndem wait ha ka por ba iaid ka jingiakren iasuk”.
Ula ong ba ka HNLC kam pat iakren satia ia ka kam ba iadei bad ka song jingiarap.
Ha kawei ka liang, u bah Sadon ula ong ba ka jingiakren iasuk kam dei ka kam kaba lah ban shu shim rai kyrkieh.
“Ka jingiakhun jong ka HNLC kala don mynta la jan 40 snem bad ban shu shim rai kyrkieh ka lah ban lam sha kano kano ka jingjia ka bym sngewtynnad” ula ong haba kyntait ban kynthoh ia ka jingkhlain bor jong ka HNLC kumba long mynta.
Pule lang ia kane: Mait kyrteng ka ECI ia ka TMC bad NCP kum ki National Party, ithuh ia ka VPP kum ka State Party ka Meghalaya
