Shillong, Iaiong 08: Kumba ju long man la u snem, ka Seng Khasi Kmie hynne ka sngi kala sdang ia ka Nohkjat jong ka Shad Suk Mynsiem jong u snem 2023 da kaba pynlong shwa ia ka duwai ka phirat hadien ka jinglum paid ha ïing seng kaba don ha Mawkhar ba la pyniaid da u General Secretary ka Seng Khasi Kmie u bah Hainess Marbaniang.
Hadien kane, ki nongshad shynrang bad kynthei ha ryngkat ka jingsynran lang jong ki rangbah ka Seng Khasi Kmie ki la mih na ïingseng ban hiar pat sha ka lympung shad kaba don ha Weiking Jaiaw ban iashim bynta pat sa ha ka Shad Suk Mynsiem.
Hadien bala poi ha lympung Weiking, la bteng pat ia ka nguh ka dem da u tymmen u san bad ka jingkyntiew ia ka lama da u Vice President ka Seng Khasi Kmie u bah O. Pyngrope.
Ka Shad Suk Mynsiem ka long ka shad ainguh ia u trai nongbuh nongthaw u la ba kyrkhu kyrdoh bad ban kyrpad ban biang ka trei ka ktah, ka shad Suk Mynsiem ka dei ruh ban pyni sha ka pyrthei ba kum ka jaidbynriew Khasi don la ka jong ka Riti Dustur ka Riam ka khor tynrai.
