Shillong, Iaiong 08: Ka State Tuberculosis Office lyngba ka office jong u District Tuberculosis Officer West Khasi Hills District ka la rakhe ia ka World Health Day bad pynlong ia ka Street Play ha Ïew Nongstoin kum ka jingai jinghikai ban pynshai sha ki paidbah nongshong shnong shaphang ka jingpang TB.
Ha kane ka jingpynlong iaka Street Play, ka District Tuberculosis Officer, West Khasi Hills kala ai jinghikai ruh kumno ban tip lada ioh ia kane ka jingpang, kiei ki dak ki shin jong kane ka jingpang bad kumjuh ruh kumno ban iada na kane ka jingpang.
Ha kane ka sngi la ioh ka jingbatai lyngkot na ka kong Tracy Kharkamni kaba dei ka State Coordinator State TB Office bad kala pynsngewthuh sha ki paidbah halor kane ka jingpang.
Ha kane ka sngi la don lang ruh u District Tuberculosis Officer ka West Khasi Hill District u Dr. R. Basaiawmoit bad ula batai pynshai sha ki paidbah shaphang ka jingpang TB, ki dak ki shin ba ki paidbah ki dei bn tip haba ioh ia kane ka jingpang, kumno ki dei ban leh ban iada ialade ban lait ban kem na ka jingpang TB kum ka jingphong ia ki Mask, sumar khuid ialade bad ka imlang sahlang, ban lait na ka biah pathar.
U Dr. Basaiawmoit u kyntu ia ki paidbah ba kin nym dei ban isih ne niewbein ia kiba pang TB hynrei dei ban kyrshan ia ki ban lait na ki jingsngewsih bapher bapher namar dei na ka jingkyrshan jong ki para briew.
Halor ka jingbatai jong u Dr. Basaiawmoit la don ruh ka Street Play la wan ban iashimbynta da ki khynnah ka Social Work Department, Women’s College Shillong ha kaba ki lah pyni ruh ia ki Drama halor ka jingshad ban hikai shaphang ka jingpang TB.
La ioh ruh ban kylli jing kylli na ki paidbah shaphang ka jingpang TB bad la ai khusnam ruh sha ki paidbah kiba la wan ban ia shim bynta lang ha ka jingiakob kyntip halor ka jingpang TB.
Ha kane ka prokram ka office jong u District Tuberculosis Officer ka West Khasi Hills district ka la ioh ban sam ruh sha ki paidbah ia ki kot lyngkdop halor ka phang “Ka TB ka pyniap namar ka jing kheiñ sting bad ka jingleh klet”.
