Shillong, Iaiong 04: Ka kynhun tem ka Dymbur hynne ka sngi haka jingiatreilang bad ka Khasi Student Union (KSU) kala pyllait iaka Music Video bala ai kyrteng U Tirot Sing- Unsung Hero.
Kane ka Music Video kadei ka khana shaphang ka jingialeh u khla wait ka jaitbynriew u Tirot Sing Syiem pyrshah iaki shipai phareng jong ka kynhun East India Company ha ki snem 1800.
Haba kren ha kane ka sngi u nongseng iaka kynhun Dymbur bah Cornelius Kharsyntiew ula ong ba kane ka sngi kadei ka sngi kaba khraw namar ka kynhun ka la lah ban pyllait iaka jingrwai shaphang ka jingialeh U Tirot Sing pyrshah iaki shipai phareng bad kane ka jingrwai la ai jingkyrshan daka KSU.
U bah Cornelius ula ong ba naka liang ka KSU kala ai ka jingkyrshan ha ki bun rukom ha ka ban pyndep ia kane ka projek bad ka thong jong kane ka jingrwai kadei hi ban iathuh khana shaphang ka jingialeh U Tirot Sing Syiem pyrshah iaki shipai phareng.
Ula ong ba kila don shibun ki nongtem bad ki nongrwai kiba la rwai shaphang u Tirot Sing hynrei ka Dymbur kadei ka kynhun tem Khasi Folk Metal kaba nyngkong ban pynmih jingrwai bad Video shaphang une u khla wait ka jaitbynriew.
Naka liang u General Secretary ka Khasi Student Union (KSU) bah Donald V Thabah ula ong ba ka seng man ka por ka iai kyrshan iaki samla kiba don ka sap la kadei haka put ka tem, ha ki jingialehkai lane ha ka liang ka arts bad culture namar ka seng ka kwah ba ki samla kin wanrah iaka nam burom iaka jaidbynriew bad ka jylla baroh kawei.
U bah Donald ula ong ba ka KSU ka kyrshan iaka Dymbur namar kadei ka kynhun tem Khasi Folk Metal ba nyngkong ban pynmih music video shaphang U Tirot Sing Syiem bad ka jingkyrshan ka KSU kadei ruh kum shi bynta ban ai mynsien ia kiwei namar ki nongtem ne ki kynhun tem napoh ka jylla kim ju ioh jingiarap naka sorkar jylla.
Ula ong ba ka thong ban pyllait mynta ka 4 tarik iaka jingrwai shaphang U Tirot Sing ka dei namar ka 4 tarik Iaiong kadei ka sngi ha kaba u Tirot Sing lem bad kiwei ki Syiem ka Hima Khasi kila hiar thma nyngkong duh iaki shipai phareng.
“Ka kynhun tem Dymbur kan long kum ka kali ban kit iaka khana shaphang ka jingialeh pyrshah U Tirot Sing bad ka jaitbynriew Khasi iaki bor ba khlain jong ka sorkar pahreng lane ka East India Company ha ki por mynshwa” la ong u bah Donald.
