Shillong, Iaiong 03: Ka Dorbar Shnong Diengpasoh Pyllun hynne ka sngi Nyngkong, kala dawa na ka seng Hynniewtrep Achik National Movement (HANM) ba kadei ban panmab bad ban pynshai ia ki jingkynnoh kiba la pynthobria iaka shnong.
U Deputy Sordar ka Diengpasoh Pyllun Bah Seibor Sana ula ong, ka jingkynnoh ka seng HANM ka long tang ka jingpynthohbria iaka nongialam shnong bad iaka shnong baroh kawei bad kaba ialam bakla ruh ia kiba bun balang.
“Haba phi kam ialade ba phi ieng na ka bynta ka jaidbynriew kan eh aiu ban iakren shwa bad ka Dorbar Shnong shwa ban pynmih ia ka khubor ban kynnoh da kumne kumtai. Phi kren ia kaba phim tip, phi hap ban panmap ha ki lad pathai khubor bad ban pynshai ia ki jingkynnoh ki jong phi khnang ba ka jaidbynriew kaba tang shi troh kan ym sngewthuh bakla” ong u Bah Seibor haba iakren bad ki nongthoh khubor hynne ka sngi.
Katba u Sordar Shnong ka Diengpasoh Pyllun Bah Louis Mukhim, ula ong ka HANM Shilliang- Umkhen Circle hapoh ka jingialam u Bah L Kharbani, kala kynthoh pyrshah ia u Sordar Shnong kumta kila shim ia ka rai ban mih shakhmat ban pynshai paidbah halor kitei ki jingkynnoh.
U Bah Mukhim ula ong ba u Sordar um long halor ia ka Dorbar Shnong bad kam long kaba iahap ban kynnoh ba u Sordar u khein nongwei ia kiba nabar shnong bad ia katei ka ktien ym ju pyndonkam ruh hapoh ka dorbar shnong.
“Ka diengpasoh kadei ka ri Raid bad ym lah ban die ia ki jaka shabar shnong, ia ki jaka shimet la shah ban iadie iathied hynrei dei ban pyntip pat ia ka shnong bad kano kano ka jingthied khlem ka jingtip ka shnong ka dei ka bym lah ban pdiang” ong u Bah Mukhim.
Haba pynrem jur ia ka jingkynthoh ka HANM, ula ong ba ka shnong ka don ka jingiadei bad baroh ki sengbhalang bad kam ju mih satia kano kano ka jingeh ne jingbym iasngewthuh jingmut bad kiwei pat ki sengbahlang namar ki ia burom bad iatreilang naka bynta ka bha ka miat.
.
“Ngi kwah iaka jingpynshai ba mynno ka shnong kala die iaka jaka sha ka Airport bad lada leh ia katei ka kam ruh kadei na ka bynta ka jingmyntoi ka shnong bad ka jylla hi baroh. Ngi kwah ban pan jingpynshai naka HANM ba mynno ka shnong kala die ia ka jaka namar haduh mynta kam pat don kum kata ba ngi lah die jaka sha ka Airport” ong u Sordar.
