Dibrugarh, Iaiong 03: Ka jingsyllad jong ka jinghap phria ba jur ha ki bynta shatei ka Assam ha Dibrugarh hynnin ka sngi U Blei ka la wanrah ka jingjulor ba shyrkhei.Katkum ki tyllong khubor heh sorkar ki la don haduh kumba 67 tylli ki shnong kiba la shah ktah hapoh Dibrugarh district namar kane ka jingshah syllad ha u phria ha ryngkat ka ‘eriong ‘erngit kaba jur.
Kiba bun ki diengbah ki la shah jynrat naduh dyngkhong bad bun ki post ilektrik ki la shah pynjulor ha ka ‘eriong ja Dibrugarh hynnin ka janmiet sngi U Blei. “ Ha kawei pat ka bynta, na ka liang ki bor pyniaiad district ha Dibrugarh ki la phah Ia ki lad jingiarap sha kito ki longiing kiba la shah ktah.
Uwei u briew u la ngat ha ka jingmynsaw ba malu mala ha Chauba namar ka ‘eriong ha kaba la pynkit noh sha hospital. Haduh mynta ym shym la ioh lum khubor ha kaba iadei bad kino kino ki jingjulor na kane ka district.
Ngi la phah 3000 tylli ki tarpaulin na ka bynta kito ki longiing kiba la shah ktah. Ka jingdon ki shnong kiba la shah ktah hapoh ka district ka lah ban nangkiew namar ngi dang ioh pdiang tang Ia ka kaiphot kaba dang shen eh, ” Ong u heh ka ASDMA.“ Nalor kata u la ong, “Namar ka jinghap u phria uba jur, kiba bun ki iing ki sem ha Moran ki la shah ktah.
Kiba bun ki tnum iing ki la shah jynrat lut ha ki bynta ka Moran. Kiba bun bah ki briew ki laa kylla khlem iing khlem sem. Ha ka sor rit Dibrugarh kiba bun ki dieng bah ki la shah jynrat bad kaba la pynthud jur ha kaba iadei bad ka leit ka wan jong ki kali. Shuh shuh ka ‘eriong ka la pynjulor ruh Ia kiba bun ki mar post ilektrik ha kiba bun ki jaka ha karein ka sor rit. Dang shen namar ka jingsyllad ka jinghap phria kiba bun bah ki iing ki sem ki la shah pynjulor ha Dibrugarh.
Tang hapoh ka shitaiew, Kane ka jingjia ka dei ka sien kaba ar ha kaba ka jingsyllad jong ka jinghap phria ka la wanrah biang ka jingjulor ba shyrkhei ha kina bun ki bynta jong ka Dibrugarh.
