Nongpoh, Lber 30 : Haduh 55 % kiba pang TB ha Ri-Bhoi kila ioh ia ka jingkoit katba 45% ki dang don hapdeng ka jingdih dawai ba hynriew bnai, ong I Dr E Kalwing, District Tubercolosis Officer ka Ri-Bhoi.
I Dr Kalwing ila pyntip ia kane ha ka prokram sam marbam sha ki nongpang TB ha PHC Byrnihat bala pynlong hynne ka sngi Palei bad ka Pioneer Carbide Pvt Limited, kum shibynta jong ka Pradhan Mantri TB Mukt Bharat Abhiyan, ban rat dyngkhong ia ka jingpang TB hapoh ka Ri bad ka Jylla baroh kawei.
Haba ai jingkren, i Dr. E Kalwing i la ïathuh ba ha Ribhoi District ki don haduh 406 ki briew kiba la ioh ia ka jingpang TB hynrei na kine, haduh 223 ngut kila ioh jingkoit kaba long 55% bad 45 % ki dang bteng ban dih dawai.
I Dr. Kalwing i la ïathuh ruh ba ka jingwan shakhmat jong ki riewshimet bad ki company bapher bapher ban tingkhun (adopt) iaki nongpang TB ka la ïarap shibun haka ban wan rah iaka jingkoit jingkhiah iaki nongpang namar haba ki nongpang ki don hapdeng ka jingdih dawai, ka met jong ki ka tlot bad ki donkam iaki jingbam kiba tei khnang ba ka met jong ki kan ïoh bor ban ïeng pyrshah ia ka jingpang.
I la ong ruh, lyngba ki jingbam kiba tei met ba la ioh lyngba ki company lane ki riew shimet, ka la wan rah shibun ki jing ïarap haka bor met jong ki Nongpang TB bad la lah ruh ban ïohi ba ki nongpang TB ki la kiew haka Kilo bad ki sngaid ki plung.
Ha kajuh ka por, I Dr. E Kalwing ila ong “Ngim dei ban le raiñ lada ngi ïoh ia kane ka jingpang TB bad ngi dei ban wan wut wut sha ki jaka sumar naka bynta ban pyntikna . Ngi dei ruh ban ibeiñ lane ñiew beiñ ia ki briew kiba don ia kane ka jingpang”.
Ka Company Pioneer Carbide Private Limited, Byrnihat ha kane ka prokram ka la tingkhun ia 10 ngut ki nongpang TB da ka ba pynbiang iaki jingbam kiba teimet khnang ba ki nongpang kin lah ban ialeh pyrshah ia katei ka jingpang. Kane ka company pynbiang iaki mar bam sha kitei ki 10 ngut ki nongpang haduh 6 bnai katba ki dang don hapdeng ka jingsumar.
Kiba la iadonlang ha kane ka sngi ki kynthup ia u Dr. J R Marak, PHC Byrnihat, P Lyngdoh STS Nongpoh TU, F J Diengdoh, DPC NTEP bad ki Samla Pule ka Women’s College, Shillong bad St. Edmunds Shillong kiba la wan ban pynshit pynshngaiñ ia katei ka program lyngba ki sur jingrwai.
