Guwahati, Lber 30 :U Myntri kam pohiing ka sorkar pdeng u Amit Shah un leit jurip ia ka jylla ka thain shatei lammihngi (northeast) ha Mizoram ha ka 1 tarik u Iaiong 2023 ha kaba un plie bad buh mawnongrim ruh na ka bynta ki projek kam pynroi ki ban kot sha ka T. 2,414 klur.
U Shah un plie bad buh mawnongrim na ka bynta ki hynriew tylli ki projek kiba kongsan ki ban kot sha ka T. 2,414 klur ha kane ka jingleit jurip ka jong u ia katei ka jylla ka thain shatei lammihngi.
Kine ki projek ki kynthup halor ka jingplie ia ka Headquarter Cpmplex jong ki shipai Assam Rifles ha Zokhawsang bad na ka bynta ka jingtrei ia ka Integrated Command and Control Centre (ICCC) kaba hap hapoh Smart City Ltd (ASCL).
Ka Assam Rifles headquarter complex ha Zokhawsang, kaba jngai tang kumba 15 km na ka thain mihngi ka Aizawl ka dei napdeng kine ki hynriew tylli ki projek.Ki shipai Assam Rifles kiba iada ia ki jaka khappud kaba ha ka jingjngai kaba 510 km bad ka Myanmar, ka don artylli ki ktem hapoh Aizawl, kata kawei ha Zodin bad kawei pat ha Khatla.Ia ka headquarter jong ka battalion kaba don ha Zodin la pynkynriah noh sha Zokhawsang.
Nalor kata u Shah un buh ruh ia u mawnongrim na ka bynta ka jingshna ia ka lynti surok Zorinpui – Longmasu NH-502A ka ban kot sha ka T. 781.85 klur, ka jingshna ia ka Aizawl Bypass (Package-1), NH-6 ka ban kot sha ka T. 329.70 klur; ka Aizawl Bypass (Package-3), NH-6 ka ban kot T. 720.72 klur bad ka jingshna ia ka Laldenga Centre ka ban kot T. 193 klur.
Ha ka taiew ba la dep, u Myntri Rangbah (CM) ka Mizoram u Zoramthanga u la iakynduh ia u Myntri ka sorkarpdeng hapoh ka ophis treikam jong u ha kaba u la pynpaw ka jingsngewnguh kaba khraw halor ka jingkular ka jong u ban wan plie ia ka Assam Rifles Battalion Complex ha Zokhawsang bad ruh ban nuh mawnongrim na ka bynta ka jingtei ia ka Laldenga Cultural Centre.
