Shillong, Risaw 14 : U Myntri Rangbah Conrad K Sangma ha ka sngi Ba-ar ula ong ba ka pilot project ban khang dam ia ki par dewiong thliew khnai bala ieh shrah ka dang iaid ha ka jingpynkhreh.
“Kumta, ngam da tip bha shaphang ka kaiphod bad nga tharai kan ym bha ia nga ban jubab halor kata. Lehse ngan sa jubab sha phi ha kawei ka por ynda nga la tip bha ia ka kaiphod” ong u Conrad haba kylli ba wat hapdeng ka hukum ka Iingkashari, ym pat don kawei ruh ka par dewiong thliew khnai bala shu ieh, kaba lah don jingker.
Ki don palat 22,000 tylli kum kine ki par tang ha East Jaintia Hills marwei.
U Myntri Rangbah ula ong ba ka jingpyndonkam ia ka pisa lyngba ka Meghalaya Environment Protection and Restoration Fund (MEPRF) ka dang iaid shakhmat, hynrei ki jingdonkam ba hap pyndep kila pynslem ia ka jingpyntreikam.
“Ki jingdonkam ban hap leh ha kaban pyntreikam ia ka pisa lyngba ka MEPRF kila shah shakhmat, hynrei ka Sorkar India bad ka Iingkashari kila buh ia ki katto katne ki kyndon kaba ngi hap ban bud ban pyntreikam bad pyndonkam ia ka. Kumta, kane kala pynlong ia kiei kiei kiba kham kyllain khyndiat ia ngi” ula ong.
“Hynrei ai ba ngan kular ia baroh ba ki jingkhang dam ia ki par, lehse ym ka jingker, hynrei ka jingkhang dam ia ki par, ka pilot project kala iaid ha ka jingpynkhreh. Ngi khmih lynti ba shen ngin sa lah ban ioh ia ka jingbit na ka bynta kane bad shen ngi dei ban lah ban pyniaid shakhmat ia ka kam” bynrap u Conrad.
Halor ka jingkylli ba iadei bad u dewiong ba 13 lak metric ton, ula ong “Ban jubab ia kane ka jingkylli halor ka 13 lak meton ton u dewiong, nga donkam ban ioh kham bun ki jingkhein jingdiah”.
