Shillong, Lber 29 : Ka Achik Conscious Holistically Integrated Krima (ACHIK) ha ka sngi Balang kala pynpaw ia ka jingsngew bynniaw halor ka jingkren jong ka Khasi Authors Society (KAS), ban iehnoh shuwa ia ka Ktien Garo na ka jingdawa ban pynrung ha ka Khyrnit ba phra jong ka Riti Synshar ka Ri India.
Ha ka kyrwoh, u Education Secretary ka ACHIK Macklawrence C Sangma ula kynthoh pyrshah ia ka jingkren jong u General Secretary ka KAS ba ka Ktien Garo kala long diengpyngkiang ia ka Ktien Khasi ban rung ha ka khyrnit ba phra ka Riti Synshar ka Ri.
Ula ong ba u briew baa bat kat ia kane ka kyrdan ba don burom, ula dei ban kham antad ban pyndonkam ia ka kyntien da kaba ong ba ka ktien Khasi ka dei kaba la rung ha ka thup ban ioh jingithuh bad ba ka Jaidbynriew Garo ka dei ban pynleit jingmut kham bun ha ka thoh ka tar bad leh research.
U Sangma ula ong ba kane ka kyntien ba pynhiar kyrdan ia ka ktien Garo ka dei ka bym iahap bad ka dei kaba lah ban iaid lait haba kren.
Haba kynthoh ia ka jingkren une u Nongialam ka KAS ba pyrkhat ba ki paid Garo ki dang duna, une u Education Secretary ka ACHIK ula ong ba u kwah ban pyntip ba ki don ki nongkren ktien Garo ha Assam, Nagaland, Tripura, Arunachal bad West Bengal nalor ka Jylla Meghalaya.
“Wat ha Bengladesh, phi lah ban shem ia ki nongshongshnong kiba kren ia ka ktien Garo, ka nuksa kaba lah ban iohi ia ka jingdon u MP Garo ha Bangladesh uba mihkhmat ia ki paid riewlum ha Bangladesh. Nalor ka Bangladesh, phi lah ban lap ia ki paid Garo bala mihkhmat da ki MLA Garo ha Assam bad Tripura Assembly. KA jingdon jong ki MLA hapoh ka IIngdorbar Thaw Ain ha kylleng ki Jylla ka pyni ia ka jingbun paid jong ki nongkren Garo ha kiwei kiwei ki Jylla ruh” ula ong haba bynrap baka Ktien Garo ka dei kaba la pule ha ki skul/college bad ki unverisity bad wat ha ka jingpule PhD ha ka ktien Garo ruh ka dang iaid.
“Ka Joint Resolution ka dei kaba la mynjur da ka Iingdorbar hynrei kam mut pat ba tang namar ngim pat lah ban pyndep ia baroh ki jingdonkam, kam mut ba kin shu kynthoh pyrshah ban pynmong ia ka jingsngew jong ki paid Garo” ong u Sangma.
Pule lang ia kane: Bynniaw ka Sur ki Nong West bym ioh jingbishar hok halor ka jingshah siat u Bah Cheristerfield
