Shillong, Lber: 29: Ka nongialam jong ka All Indian Congress Committee (AICC) ka Bobeeta Sharma hynne ka sngi Balang, kala kynnoh ba u Myntri Rangbah ka jylla u Conrad K Sangma u don jingiajan bha bad ka Bharatiya Janata Party (BJP) bad dei namar kane u kyrshan bha iaka Sorkar Pdeng kaba ialam da ka BJP ban mait kyrteng ia u Rahul Gandhi kum u dkhot ka Lok Sabha.
Haba kren sha ki lad pathai khubor ka Bobeeta Sharma kala kynnoh ruh ba ka jingkloi ka sorkar pdeng ba ialam da ka BJP ban mait kyrteng ia u Rahul Gandhi kadei naka bynta ban iada ia ki kam bamsap jong u Gautam Adani u ba iajan bha bad u myntri rangbahduh ka ri India u Narendra Modi.
Ka Bobeeta kala kam ruh ba ka sorkar BJP ka sheptieng iaka jingtrei shitom jong u Rahul Gandhi namar ula wanrah shibun ki mat ban iatai hapoh ka ïing dorbar thaw aiñ (Parliament) ka ri India khamtam haba iadei bad ki kam bamsap u Adani, ka jingkiew dor ki marbam mardih, ka kyrduh kam kyrduh jam, ka shongsuk shongshngaiñ jong ki kynthei, ka hok jong ki riewlum bad shibun kiwei pat kiba ktah ia ki paidbah ka ri India.
“Ka daw ba shah mait kyrteng u Rahul Gandhi kadei hi namar ula kren hapoh ka Parliament shaphang kawei na ki mat ba kongsan bha bad kata ka dei ki kam bamsap u Gautam Adani lane ‘Adani Scam’ ha kaba kane ka kompeni kala bamklop iaka pisa jong ki paidbah ka ri India” la kynnoh ka Bobeeta.
Ka Bobeeta kala kynnoh ba kane ka kompeni Adani ka la ioh ia ka jingiada na ka sorkar pdeng ba ialam daka BJP watla ka jingbamklop pisa ka long ka ba bun bha bad halor kane ka Congress lem bad kiwei pat ki Party ha ka Liang Pyrshah ki la dawa ba kan don da ka jingtohkit ba kyrpang ka ban tip kum ka Joint Parliament Committee (JPC) ban peit bniah bad wad jingtip bniah halor kane ka mat hynrei ka sorkar BJP kam shem la ailad satia.
Kala ong ruh ba ka jingleh jong ka BJP ka dei hadien ba ki la iohi ia ka jinglah u Rahul Gandhi ban pynlong iaka Bharat Jodo Yatra ha kaba ula ioh jingkyrshan na kiba bun ki paidbah ha kylleng jong ki jylla jong ka ri India bad dei namar kane ka BJP ruh kala pynsheptieng bad kala phah mait kyrteng syndon.
Haba pynrem ia u Conrad ba kyrshan iaka jingshah mait kyrteng u Rahul Gandhi, ka nongialam jong ka AICC kala ong ba u myntri rangbah ka Meghalaya u Conrad K Sangma ula don lang bad ka BJP naduh kaba sdang bad dei namar kane ka jylla ruh kala shah kynnoh kum ka jylla ba bamsap tam hapoh ka ri India baroh kawei.
Ka Bobeeta kala la ïathuh ruh ba u MP ka Rajya Sabha u Jairam Ramesh u la dep phah da ka jingthoh sha u Director ka CBI ban dawa tohkit halor ka jingkynnoh bamsap iaka sorkar Meghalaya da u myntri rangbahduh ka ri India u Narendra Modi bad u myntri ka tnat kam pohïing ka sorkar pdeng u Amit Shah.
Pule lang ia kane: Ha ka 10 tarik u Jymmang yn long Elekshon MLA ha Sohiong Constituency
