Nongstoin, Lber 29: Ka Sur ki Nong West mynta ka sngi kala pynpaw iaka jingbynniaw iaka sorkar MDA ka bym shim la lah ban ai ka jingbishar kaba hok halor ka jingshah siat u (L) Bah Cheristerfield Thangkhiew bad kam shym la lah ruh ban pynkynriah noh ia ki jadibynriew kiba sah ha Them Metor, Shillong.
U Nongialam ka Sur ki Nong West u Samla Wilstone Sohshang, ula pynpaw ia ka jinglyngoh ba ka sorkar haduh mynta kam shym la lah ban ai ka jingbishar kaba hok ia ki bahaiing bahasem jong u (L) Cheristerfield Thangkhiew bad kam shym la lah ruh ban ai ka jingpynshitom ia kiba donkti ha kaban siatiap ia une u rangbah haduh kine ki sngi.
Ula ong, ba na ka liang u MLA ka Nongkrem u Bah Ardent Basaiawmoit ula wanrah ia katei ka mat haka Dorbar Mang Tyngka ban kylli na ka sorkar, mano ba ai bor ban phah siat hynrei ka jubab jong u Symbud Myntri Rangbah uba bat ia ka tnad kam pohing kam long kaba shai, kumta ka Sur ki nong West ka dawa ba dei ban pynshitom ia kito kiba donkti katkum ka aiñ.
Katba u Bah Dispitol Sun ula pynpaw iaka jingsngewkhia ba ka sorkar kam shym la lah ban pynkynriah ia ki briew kiba shong basah ha Them Metor hynrei kala shu kut tang ha ki Committee bapher bapher bad ka Sur ki Nong West ka kwah ba ka sorkar kadei ban pynkynriah noh ia kito kiba shong be-aiñ ha katei ka jaka namar ki nongshong jong ka dong thaiñ, ki hap iaid lynti na katei ka jaka bad kala ju don ruh ka jingjia ba kitei kiba shong be-aiñ kila leh tohmet, kumta ka sorkar kadei ban pynkynriah noh kloi ia kitei khnang kan wanrah ia ka jingshongsuk ia ki paidbah bad ia ka jaidbynriew.
U Samla Wanteibok Lyngdoh ula pynpaw ka jingsngewkhia ba kiba bun ki khun samla kynthei bad shynrang jong ka dong ka thaiñ ki ud ki nam, ba ka jingdon bad ka jingpyntreikam ia ka Reservation Policy kala ktah bha ia kiba wad kam namar ia kane ka policy la pyntreikam naduh ka por ba ioh la ka jong ka jylla ha kaba ki kynhun jaidbynriew Garo ki ioh 40% katba ngi ki Khasi ki ioh 40%.
Ula ong, lada peit ia ka jingbun briew, lah kham bun paid ki Khasi ban ia ki Garo, namar ki Garo mynta ki don kumba 9 lak ngut eiei katba ki Khasi ngi don 15 lak ngut eiei, te kane ka la wanrah iaka jingeh khamtam hadien ka jingwanrah ia ka Roster System da ka ïingbishar ba don burom.
Ka Sur ki Nong West kala pynpaw ruh ba ka ai jingkyrshan ia u Bah Ardent Basaiawmoit uba la wanrah ia kane ka mat ha Assembly ban phah pynbeit noh ia ka Reservation Policy kaba la ktah shisha ia ki Khasi ha kine ki snem kiba la leit haduh mynta bad ka Sur ki Nong West ka long kaba kloi ban mih shakhmat na ka bynta ka bha ka miat jong ki khun samla jong ka dong ka thaiñ bad ka jaidbynriew.
Pule lang ia kane: Suba jur ba iap ki sniang na ka Swine Flu ha ka Farm Sorkar ha rilum Garo
