Shillong, Lber 29: Ka Garo Students Union (GSU) kala pynrem jur iaka jingkren ban myntoi shimet u Bah Ardent Miller Basaiawmoit, President ka VPP, ban myntoi ha ka kam saiñ pyrthei bad ban wanrah iaka jingsngewpher jingmut ha kaba iadei bad ka jingpyntreikam iaka Roster Sytem.
U President ka GSU u Zikku Balgra N Marak ula pynpaw ba ka Central Executive Committee (CEC) jong ka GSU ka dap da ka jingsngewkhia halor ka jingkren u nongialam ka VPP u Bah Ardent Basaiawmoit bad iaka jingthmu ban pynkhihwin iaka rukom treikam kaba la mynjur daka iingkashari Meghalaya High Court.
“Hap ban buh jingkylli ia u President ka VPP u Bah Ardent u pyrshang ban pynurlong ia kaei ne kaei ka jingthmu ka jong u ban ai ia ki jingtip kiba bakla ia ki paidbah ha kaba iadei bad ka Roster System” la pynpaw u President ka GSU.
Ula ong, ba ka jingpyntreikam iaka Roster System ka long kaba khuid ba suba, kaba biang bha ha kaba la ai iaka lad ia baroh lang bad ka paw la kumba u President ka VPP u kham kwah bha ban don ka jingthungkam na sha lyndet, ka jingaikam na ka bynta kiba ai pisa bad ka jingnoh shilliang bad ka jingthmu ban pynduhlang ia ki jaidbynriew Garo ban ioh iaki lad ki kabu bad kum katei ka rukom leh jong u Nongmihkhmat uba la rangbah ka long kaei kaei ka bym itynnad.
