Shillong, Lber 29: Ka jylla Meghalaya ha ka sngi Baar, kala rakhe iaka World Tuberculosis Day 2023 halor ka phang “Yes! We can End TB”, ha ka prokram kaba la long ha Soso Tham Auditorium, Shillong kaba la pynlong da ka Ophis jong ka Mission Director, National Health Mission, Meghalaya.
Ia katei ka prokram la plie da ka Myntri kaba khmih iaka tnad Health & Family Welfare ka Dr M Ampareen Lyngdoh ryngkat ka jingdonlang ki heh ophisar ka tnad ka koit ka khiah bad kiwei kiwei.
Haba kren kum ka Kongsan ha ka jingialang, ka Dr M Ampareen Lyngdoh kala ong, ba ka Tuberculosis kadei ka jingpang kaba shyrkhei kaba shim wat iaka jingim briew hynrei kadei pat ka jingpang kaba lah ban iada bad kaba lah ban pynkoit pynkhiah lada shim dawai thikna.
Kala iaroh ruh iaka jingtrei shitom jong ki nongai jingsumar ha ka jylla kiba la long kum kita ki atiar kiba iakhun ban pynduhjait iaka jingpang TB hapoh u snem 2025 kaba long katkum ka National Strategic Plan (NSP) for Tuberculosis (2017-2025) ban pynduhjait ia ka jingpang TB hapoh u snem 2025.
Ka Kong Ampareen kala kyntu ia baroh kiba don bynta ba kin iakhun ia kane ka jingpang kaba shyrkhei ba ka don ka jingkyrmen da ka jingkylla haka rukom pyrkhat kaba thymmai jong ka sorkar jylla kaba phaikhmat ha ki shnong ki thaw ia kaba yn lah ban pynurlong ia ka jingthmu jong ka NSP.
Ha katei ka prokram, ka Myntri Sorkar ryngkat bad ki heh ki haiñ, kala sam ia ki Sub National Certification sha ka East Khasi Hills District kaba la ioh iaka takma rupa kaba shongdor T.3 Lak bad iaka takma rnong kaba shongdor T. 2 Lak la ai sha ka West Jaintia Hills, West Garo Hills bad West Khasi Hills district.
Nalor kane, la sam ruh ia ki khusnam sha ka Ri-Bhoi, East Garo Hill bad South Garo Hill district da ka NHM Meghalaya halor ka jingtrei shitom ka jongki ban pynduna iaka jingpang TB bad kitei kila ioh iaka syrnod bad ka song tyngka kaba mar T.50,000 bad la sam ruh ia ki khusnam sha ki nongjop haka jingiakob dro dur ha ka kyrdan Junior bad Senior bad la pynkup burom ruh ia ki TB Warrior/Champion kiba la koit la khiah krad na ka jingpang Tuberculosis.
