Shillong, Lber 29: Ka Hynniewtrep Youth Council (HYC) hynne ka sngi Balang, kala leit kynduh iaka myntri ka tnat Ain ka sorkar jylla ka kong Ampareen Lyngdoh ban ai jingmut ba ka sorkar kadei ban khmih biang sa shisien ha shwa ban pyntreikam ia ka Roster System ha kane ka jylla.
Haba kren sha ki lad pathai khubor u President ka HYC u bah Robertjune Kharjahrin ula ong ba ka HYC kala ai jingmut ia ka sorkar ba ka Roster Maintenance Policy kadei ban treikam beit naduh ka sngi ba pynmih shakhmat bad ym dei ban phai biang shadien naduh u snem 1972.
U bah Robert ula iathuh ba na ka liang ka myntri ka tnad ka tnad Ain ka kong Ampareen kala pynpaw ba donkam ban peit sa shisien bad kala kular ban bishar ia kine ki jingai jingmut bad kan rah ban iakren bad u Myntri Rangbah ka jylla halor kane ka mat namar ba ia kane ka Roster ymdei ba la rai tang da ka tnad Law hynrei la rai da ka kynhun Myntri sorkar MDA ha u snem ba la dep.
Pule lang ia kane: Suba jur ba iap ki sniang na ka Swine Flu ha ka Farm Sorkar ha rilum Garo
Ula iathuh ba na ka liang ka seng, kan peit ha kine ki shi taiew la ka sorkar ka shimkhia ne em ia kane ka mat bad ula byrngem ba lada ka sorkar ka leh mutlop kim banse ban leit sha ïingkashari ban leh kumba u Myntri Rangbah ka jylla u la kren hapoh ka Iing Dorbar Thawain Mang tyngka dang shen ‘Ki bym hun ia ka Roster kidei ban leit sha ïingkashari’.
“Ka jingkren jong u Myntri Rangbah ka mut ba um kwah shuh ban iakren hapoh ka sorkar. Hynrei ngi watla katta ruh, ngi dang ai jingmut ia ka sorkar namar ba lada ngi leit sha ïingkashari kaba ma, ka long ba ioh ka mih shibun ki kynrum kynram. Lada ha ka shi taiew lada ngim iohi ba kan don kano kano ka jingshimkhia na kane ka jingiakren, ngim banse ban iaid noh sha ïingkashari. Namar ngim kwah ba ka jaidbynriew jong ngi kin duh kam katba kiwei kin ioh kam,” la ong u bah Robert.
U bah Robert ula ruh ba ka seng ka kwah ba ka sorkar kan shim ia ka jingkitkhlieh ba kan pynbit pynbiang ia kane ka kam la kadei ka Reservation bad ka jingthmu ban pyntreikam ia ka Roster. Lada ka sorkar kam leh eiei, kan sa poi ka por ba ngin tynjuh ia ka Polisi baroh kawei bad u Conrad Sangma u hap ban shim ia ka jingkitkhlieh hadien habud.
