TURA, Lber 29: Bun tylli ki sniang kiba ri da ki nongrep hapoh shnong Dalu, West Garo Hills kila iap mynta la shi taiew tam bad na ka liang ki heh ophisar ka tnad Animal Husbandary & Veterinary kila leit khmih ia kitei ki jaka ri sniang bad ban shim ruh ia ki sot nongmuna ban pynlong iaka jingwad bniah khamtam haba kala don ka jingsuba jur ba kitei ki sniang ki lah ban iap na ka daw jong ka jingsaphriang ka jingpang Swine Flu.
Ka jaka ri sniang jong ka sorkar kaba jngai 51 Km na Tura kadei ka jaka kaba ri bun tylli ki sniang hynrei kine ki mrad kila sdang ban khlad kynsan bad kane kala pynsuba jur ia baroh bad la khangdam noh shwa ia katei ka jaka ri sniang ban tehlakam ba kan ym don kano kano ka jingsaphriang sha kiwei pat.
Katkum ki tyllong khubor ba la iohlum la iathuh ba la suba jur ba ki sniang ki lah ban iap namar ka jingpang Swine Flu hynrei ki ophisar sorkar ki dang ap iaka kaiphod ban lap ia ka daw tynrai.
U Deputy commissioner ka West Garo Hills u Swapnil Tembe ula ong, ki ophisar ka tnad veterinary kiba don hapoh ka district kila dep pyntip ia u halor ka jingiap ki sniang kiba don ha ka jaka ri sniang jong ka sorkar.
Ula iathuh ba la dep ban phah ia ki sot nongmuna ban leh iaka Test bad la shim ruh ia ki lad ki lynti ban tehlakam ba kan ym don ka jingsaphriang ia katei ka jingpang.
Watla ki ophisar ka veterinary ki dang lum jingkhein iaka jingiap ki sniang hynrei ia mynta hi kam shym la don shuh kano kano ka jingiap jong ki sniang na kiwei pat ki bynta jong ka rilum Garo.
Shuh shuh ym shim la buh ruh ia kano kano ka jingpyrkhing ha kaban khang iaka jingdie ne ban bam doh sniang ha rilum Garo hynrei ka tnad veterinary kala long pat kaba peitngor bha.
