Shillong, Lber 28 : Ka Sorkar Meghalaya bad ka Assam, ki lah ban sdang ia ka jingiakren pynbeit pud jong ka kylla kaba ar ha u bnai Jymmang ban wad ia ka lynti ha kaban lah pynbeit noh ia ka jingiakajia ha ki hynriew tylli ki jaka ba dang sah.
Haba iakren bad ki nongthoh khubor hadien ka Dorbar Mang Tyngka hynne ka sngi Ba-ar, u Myntri Rangbah ka Jylla ula ong ba u ju kren barabor bad u Myntri Rangbah ka Assam Himanta Biswa Sarma ha ka kyrdan jong u shimet bad ba ka jingiakren ha ka jingshisha kala dep sdang.
“Hynrei ka jingiakren hapdeng ki sorkar, ngin hap ban iapynbeit lehse ha kaba kut jong u bnai Iaiong lane lehse ha u bnai Jymmang” ula ong.
“Ngi lah ban sdang noh ia ki jingpynkhreh bad ka jingiakren namar ngi kwah ba ki Regional Committee kin iashong lang bad leh ia ka homework, ban tip bniah ia baroh ki ishu. Ngi khmih lynti ba ha u bnai Jymmang ngi lah ban sdang noh namar ngi kwah ban leh bha iala ka homework” ula bynrap.
Ha ka 24 tarik Lber, ka Sorkar Jylla kala thaw biang ia ki lai tylli ki Regional Committee ban shong bishar ia ka jinglong jingman jong ki 6 tylli ki jaka ba dang sah ha ka jingiakajia bad ban aiti ia ka kaiphod hapoh ka 45 sngi.
Pule lang ia kane: Kyntait ki Hospital ka Jylla ia ka jingbuhdor ka CGHS
