Shillong, Lber 28: Ki Hospital haka jylla ki lah ban ym mynjur ban pyntreikam iaka dor jongka Central Government Health Scheme (CGHS), la iathuh ka Myntri ka koit ka khiah ka Dr Ampareen Lyngdoh ha ka iingdorbar thawaiñ hynne ka Sngi Hatmajai.
“Ka dor jong ka CGHS ka long kaba rit haba ianujor bad ka dor jong ki hospital, kumta kiba bun ki hospital ki lah ban ym mynjur bad katei ka jingbuh dor kaba don ka jinglah shilliang kumba 70%,” ong ka Dr Lyngdoh haba jubab iaka jingkylli kaba la buh da u MLA ka North Shillong u Bah Adelbert Nongrum.
“Ngi la phah da ka jingthoh sha kitei ki hospital hynrei haduh mynta ngim shym la ioh ia kano kano ka jubab” ong ka Myntri Sorkar.
Kala iathuh ba kumba long mynta, dei tang ka North Eastern Indira Gandhi Regional Institute of Health & Medical Sciences (NEIGRIHMS) kaba pyntreikam iaka dor jong ka CGHS ha ka jylla.
Ka Myntri kala pyntip ruh ba ka dor jong ka CGHS ka dei katkum ka all India standard rates ia kaba ym shym la pynkylla thymmai mynta la bun bun snem.
“Ngin ailad iaka sorkar India ba kan pynkylla thymmai noh ia ka dor jongka CGHS namar ba ka jingpynkylla kaba la leh khatduh eh kadei ha u snem 2005-06,” ong ka Dr Lyngdoh.
Kala ong ba kan long ka bym dei ia ki dkhot ka iingdorbar ban pynpaw ba ka sorkar kam don ia ka jingsngewkhia halor kane ka mat.
Pule lang ia kane: Hukum ka Kashari POCSO ban set along 35 snem ia u Nongleh beijot
