Shillong, Lber 28 : U Myntri Rangbah ka Jylla Conrad K Sangma hynne ka sngi Ba-ar, ula ong ba ka Sorkar kam shym la lah satia ban pynkhie im ia ka Mawmluh Cherra Cement Limited (MCCL) watla kala dep ban kynshew bad pynlut palat T. 350 klur ka pisa.
Haba jubab ha Iingdorbar, u Conrad ula ong ba ha kine ki san snem bala leit, ka Sorkar kala theh biang sa T. 100 klur sha ka MCCL ba kan siew ia ka tulop bad ki bainong jong ki Nongtrei.
“Ka Sorkar ha kiba bun ki khep kala theh bad kynshew pisa ban pynim ia ka MCCL” ula ong.
Haba pynpaw ba ka Sorkar kam lah shuh ban iai bteng ha kaban kynshew pisa ia ka MCCL, u Myntri Rangbah ula ong ba na ka bynta ka bha ka miat jongki Nongtrei bad ka pla tyngka, ka Sorkar kala wad ia baroh ki lad ki lynti ban leit da ka Joint Venture ha kaban pyniaid ia kane ka kompani ka sorkar.
“Hynrei, ngim pat dep shim rai satia halor kane ka kam” ula ong.
U Conrad ula pyntip ba ka Joint Venture Partnership ka dei kawei na ka lai tylli ka lynti ba ka Sorkar ka dang bishar. Ki artylli kiwei pat ka long ba ka Sorkar kan iai bteng ban kynshew pisa ha ka kompani lane ban shu khang dam noh ia ka kompani.
“Ki don satang kine ki lynti bad ngi la pyrshang ban wanrah da ka lynti kaba biang eh khnang ba kan nym kynton than ia ka jingpynlut ha ka Sorkar” ula ong.
Shuwa kane, u Nongialam ka VPP bad MLA ka Nongkrem Bah Ardent M Basaiawmoit ula ong ba lada leit da ka Joint Venture kan buh ia ka MCC ha ka jingma haba ai jingmut ba kan bha shibun lada ka Sorkar ka shong pynia nujor bad ka jingtreikam ki karkhana dewbilat kiba don ha Ri-lum Jaintia.
Haba jubab, u Symbud Myntri Rangbah ba khmih ia ka Tnad Commerce & Industries Bah Sniawbhalang Dhar ula pyntip ba ka Sorkar ka dang ap ia ki kot ki sla ban sa aiti da ka kompani, kaba la pynpaw ia ka jingkwah ban iatreilang bad ka Sorkar lyngba ka Joint Venture.
“Ka jingbishar ka dang iaid bad ngin sa shim ia ka rai hadien ba ngi la bishar ia ki kot ki sla jong ka kompani” ula ong.
U Symbud Myntri Rangbah ula kular ban sa shong bishar ia ka jingai jingmut ban shong nujor ia ka jingtreikam ka MCCL bad ki karkhana ha Ri-lum Jaintia.
Ka MCCL ka don haduh 280 ngut ki Nongtrei.
