Shillong, Lber 23 : U Myntri ka Tnad Public Health Engineering (PHE) Marcuise N Marak, hynne ka sngi palei ula pyntip ba ka tnad kala buh por ban pyndep hapoh u bnai Jylliew mynta u snem ia ka Pohkseh Water Supply Scheme.
Ia kane ka project la mang tyngka naduh ka 29 tarik Lber, 2018.
Haba jubab ia ka jingkylli bala wanrah da u MLA ka AITC na Nongthymmai Bah Charles Pyngrope ha Iingdorbar, u Marak ula ong “Ka pisa bala mang ia kane ka project ka long T. 85,84,600.00 bad kaba la pyndonkam haduh mynta ka long T. 45,59,441.00.
Ula pyntip ba ki Nongshongshnong ia kiba la khmih lynti ban ioh jingmyntoi hadien ba pyndep ia kane ka project kan long 7760.
Hynrei u Marak ula ong ba ka kyndon ban ai umkor iing kam shym la don ha kane kaskhim naba ia ia umkor iing la ai da ka Dorbar Shnong.
Haba wanrah ia ka jingkylli bynrap, u Bah Charles ula ong ba ka jingpyntrei ia kane ka kam ka long kaba suki bha bad kyrpad ia u Myntri ban leit jurip ia ka jaka ba pyntrei ia ka project.
U Myntri ula kular ban sa shimkhia ban iakren ia kane ka kam bad ong “Ka Pohkseh ka dei kaba nga sngewjan bha. Ngan shimkhia bha ia kane ka kam”.
Ula pyntip ba ka jaka bala ai mynshuwa ka long kaba jngai bad kaba bun jinglut na ka bynta ka tubewell bad namar kata, ka Tnad kala pan ia kawei pat ka jaka kaba iajan bad ka shnong khnang ban pynduna ia ka jinglut.
“Mynta ka Dorbar Shnong kala ithuh ia ka jaka” ula bynrap.
Pule lang ia kane: Sdang ka PWD ia ka kam thied jaka ban pynheh ia ka NH-6 sha ka surok 4 lane
