Shillong, Lber 23 : Ka Congress kaba don ha ka Liang Pyrshah, kala kyntu ia u Myntri Rangbah ka Jylla Conrad K Sangma ba un tuklar halor ka jingkynnoh “lehdonbor” jong ka Sorkar Assam da kaba khang ia ki kam pynroi kiba la pyntrei ha ki shnong ba don ha khappud.
“Nga kyrpad ia u Myntri Rangbah ban tuklar ia kane ka kam bad ban pynsangeh ia ka jinglehdonbor ka Sorkar Assam na ka bynta ka jinglah pyntrei khlem jingpynthut ia ki kam pynroi ki ban ai jingmyntoi ia ki paidbah ba sah ha khappud” ong u MLA ka Congress na Mawhati Bah Charles Marngar haba wanrah ia ka jingkylli bynrap ha ka kynta kylli jingkylli hapoh ka Iingdorbar hynne ka sngi palei.
Une u MLA ula kynnoh ba bun ki kam pynroi bala pyntrei da ka Sorkar Meghalaya kila shah khang ha ka Sorkar Assam bad ai nuksa ia saw tylli ki project ba kynthup ia ka ICDS Building ha Madan Umwang, skul SSA Lower Primary (kaba la shah pynpra), ka skhim JJM ha Jatalong bad ka IIngdorbar Shnong ha shnong Umru.
Haba jubab ia kane, u Myntri Rangbah Conrad K Sangma ula ong ba ka dei ka jingshisha ba katto katne ki project kila shah pynsangeh hynrei kam dei pat kaba la jia ia bun tylli ki project.
“(Kane ka dei namar) ki kam ha ka thain kaba ngi hap ban pynbeit” ula ong haba pyntip ba ka jingpyntrei ia ki spah tylli ki project kila iaid shakhmat mynta.
Haba kubur ba ym dei ban pynsangeh ia kano kano ka kam pynroi, u Conrad ula ong “Kane ka dei ka daw balei ba ngi la iai bteng ban buddien bad ka Assam haba mih ki jingujor ba shah khang ki kam ba pyntrei. Tang mar syn ioh jingtip, ki Deputy Commissioner bad ki Ophisar ba dei khmih, mar mar kila iakren bad kila pyrshang ban pynbeit ia kine ki kam kham kloi kat kaba lah”.
Ula bynrap “Ha kine ki khyndiat bnai bad snem, ngi la iohi ia shibun ki project, kiba la shah pynsangeh, hynrei ki kam kila sdang biang”.
U Cinrad ula ong ba ki don ki khep ha kaba ki kam pynroi jong ka Sorkar Assam ruh kila shah khang da ki paidbah kiba dei na Meghalaya.
“Kane ka dei ka daw balei ba ki arngut ki Myntri Rangbah kila ong ba watla ngi lah ban don kano kano ka jingiapher jingmut, ki kam pynroi kim dei ban shah pynsangeh. Namar kata, 99% na kine ki kam kila iaid beit iaid ryntih hynrei ki don katto katne ki kam kiba hap ban iakren” ula bynrap.
U Myntri Rangbah ula kular ban tuklar ia kum kine ki jingjia bad ong “Nga kyrpad ia ki dkhot ban phah ia ki jingtip. Ngi long kiba suk ban iashem ne iakrem bad ngi angnud shisha ban pynthikna ba kum kine ki jingeh ki dei kiba hap ban pynbeit. Lada don kino kino ki jingeh, ngin tuklar mardor. Ki Dkhot ki lah ban ai da ka jingthoh bad ngin sa iakren mardor bad ka Sorkar Assam”.
Pule lang ia kane: Sdang ka PWD ia ka kam thied jaka ban pynheh ia ka NH-6 sha ka surok 4 lane
