Shillong, Lber 22 :U MLA ka seng Congress na Umsning u Dr Celestine Lyngdoh ula ong, ban kam ba ki surok kidei u budlum jobg ka jylla kam long kaba iahap ha ka jylla Meghalaya namar ka jingsniew ki surok kadei ka dawbah ba ki paidbah ba kin kdiah iaki shyieng ki shruh.
U Dr. Lyngdoh uba don ha ka Liang Pyrshah ula kren ia katei haba buh iaka jingkylli hynne ka sngi hapoh iing dorbar thawain ka jylla.
Pule lang ia kane: Bluit mih ka Vision Document ka VPP da ka Hindi – “Ym sngewthuh Hindi hynrei thoh bad pule te nang”
Haba jubab ia kane, u Symbud Myntri Rangbah ka jylla uba khmih ruh iaka tnad PWD Roads Bah Prestone Tynsong ula ong, ka jingshah ban kit ia kino kino ki jingkit ka long katkum ki kyndon jingbthah kiba la buh da ka Indian Roads Congress (IRC) naduh ki surok National Highway haduh ki surok district road.
Ula ong, ka jingkit ka long naduh 12 Ton haduh 18 Ton hynrei ki don pat ki jingjia ba ki trok ki kit haduh 35-40 Ton.
U Bah Tynsong ula pyntip ba ka techical specification na ka bynta ka jingrben jong ki surok PWD kadei kaba la bud ryntih iaki kyndon jongka IRC.
Ula kdew ruh ba ka don ka jingiapher ha ka jylla Meghalaya bad ka Rajasthan.
“Kam dei ka kamram jongka jylla ban dawa ban shna rben iaki surok hapoh ka jylla” ong u Bah Prestone.
Ula pynshai ruh, ba ka IRC kala dep ban pynlong ia ka jingwad bniah ha man la ki jylla ym tang ha Rajasthan hashwa ban pynmih iaka Manual (ha kaba iadei bad ka jingrben jongki surok).
Ha kaba iadei bad ka jingmaramotnia ki surok kiba sniew, u Bah Tynsong ula ong, ka sorkar kala shim ia ki lad ki lynti da kaba pynrung iaki kyndon ba dei ban don iaka “Warranty” ia ki surok kiba dei ki projek kiba la bei tyngka da ka sorkar jylla.
Ula pyntip ba ka jingshna ia ki surok ha nongkyndong lyngba ka Pradhan Mantri Gram Sevak Yojana (PMGSY) ruh la bud ryntih ia ki kyndon jingbthah jongka Rural Roads Manual, 2002 (SP-20) jongka IRC.
Ha kaba iadei bad ka annaul maintenance contract (AMC) jongki surok PMGSY na ka bynta 5 snem hadien ba la dep ban shna iaki, u Bah Tynsong ula ong, ki kyndon jong ka jingmaramot ia ki surok kadei na ka bynta kito ki skhim kiba la mang lyngba ka RIDF XXVI bad ki don ruh katto katne ki skhim kiba la mang lyngba ka systematic maintenance programme (SMP).
Na ka liang jong u MLA ka UDP na Mookaiaw u Bah Nujorki Sungoh ula kyrpad iaka sorkar ban khmih lem ia ki 3 tylli ki surok PMGSY kiba don ha ka constituency jongu kiba la sniew bha bad na ka liang u Symbud Myntri Rangbah ula pynthikna ban shimkhia ia katei ka jingpynsngew.
