Shillong, Lber 20: Saw ngut ki MLA ka Voice of the People Party (VPP) hynne ka sngi nyngkong, kila mih jyndat na Iingdorbar Thaw Ain ka Jylla kum ka jingpyrshah ia u Lat ka Jylla Phagu Chauhan namar ka jingkren da ka ktien Hindi hapoh ka Iingdorbar.
Kane kala mih hadien ba u Lamphang Thomas A Sangma, ula ailad ia u Lat ka Jylla ban ai jingkren lamphrang da ka ktien Hindi.
U Nongialam ka VPP na Nongkren Ardent Millen Basaiawmoit ula ieng ban pyrshah mar mar hadien ba u Lat ka Jylla ula sdang ban ai jingkren da ka ktien Hindi ha ka sngi sdang jong ka Dorbar Mang tyngka ka Iingdorbar.
U Bah Ardent ula ong ba ka Rules kala kren shai ba ki jingiakren hapoh ka Iingdorbar Thaw Ain ka dei ban long da ka ktien phareng.
“Lyngba jong phi sir, nga kwah pyntip ia u Lat ba ka Meghalaya kam dei ka Jylla ba kren Hindi. Nga kwah ban pynkynmaw ruh ia baroh ba ki paidbah bad ki nongialam jongka Jylla kila rai iaid la ka jong ka lynti bad ka Assam namar ka Sorkar Assam kala pyrshang ban pyndonkam ia ka ktien Assamese kum ka Official Language. Sir, nga sngew ba ngim dei ban ailad ia kane ba kan long ka riti hapoh ka Iingdorbar” ula ong.
“Ka Sorkar India kam shym la pynsngap ia ka jingdawa ka Jylla ban pynrung ia ka Ktien Khasi bad Garo ha ka khyrnit ba phra kaba la pynduhlad ia ka Jylla jong ngi. Namar kata, nga kyntu ia phi Sir ba u Lat u dei ban kren sha ngi da ka ktien kaba ngi sngewthuh” ong u Bah Ardent.
Namar ka jingbym hun ia ka rai jong u Lamphang, une u Nongialam ka VPP ula pyrta slogan “down down, ngi pynrem ia u Lat ka Jylla namar ka jingai jingkren sha ngi da ka ktien kaba ngim sngewthuh”.
U Bah Ardent ula ong “Ka Sorkar India kala phah da u Lat ba kren da ka ktien Hindi ia uba ngim sngewthuh bad kane ka dei ka jingibein bad ngim kwah ban iadon bynta bad kane”.
Namar kata, u Bah Ardent bad ki lai ngut ki MLA ka party kila mih jyndat noh na Iingdorbar kum ka dak ka jingpyrshah.
Haba pynpaw ia ka jingsngewkhia halor ka rukom leh jong kine ki dkhot ka Liang Pyrshah, u Myntri Rangbah ka Jylla Conrad K Sangma ula ong, naba u Lat ka Jylla um lah ban pule phareng, ia ka jingkren jong u bala pynkylla ktien, la dep ban sam hapoh ka Iingdorbar kat kum ka Rule bad kam don daw satia ia ki dkhot ba kin pyrshah.
“Lada u briew um lah ban pule English, ngim lah satia ban shu pynbor ia u. Ka jingkren bala buh jingthoh, la dep ban sam hapoh ka Iingdorbar. U khlem leh ia kane namar ba u kwah khnang, ula leh namar ba um lah ban pule. Ka long kaba sngewsih ban iohi ia ka jingbym burom ba kum kane ia u Lat ka Jylla” ong u Conrad.
