Shillong, Lber 18: Ka sorkar jylla lyngba u Commissioner & Secretary ka tnat Pule Puthi hynne ka sngi kala thung ia u Secretary ka tnat Pule Puthi u R. Rapthap kum u dkhot lane u Member Secretary jong ka State Education Commission (SEC).
Lah ban kdew bah aka 9 tarik Naiwieng 2022, ka kynhun myntri ka sorkar jylla kala mynjur ban thaw Meghalaya State Education Commission (MSEC) naka bynta ban wad ki lad lynti kumno ban kyntiew bad ban wanrah ka jingkylla iaka pule puthi hapoh ka jylla.
Ka rai jong ka kynhun myntri sorkar kala mynjur ruh ba kin don haduh 4 ngut ki dkhot (Member) hapoh ka MSEC khamtam ban bishar haba iadei bad ka jingdon bun tylli ki jait skul hapoh Meghalaya.
Ia kane MSEC yn khlieh da u/ka Chairperson, 2 ngut ki Advisers bad 1 Secretary.
Haba iadei bad kane u myntri rangbah ka jylla u Conrad K Sangma ula ong “ka long kaba donkam ban don noh iaka MSEC ne ka Commission naka bynta ban bishar iaka jinglong jingman ka pule puthi hapoh ka jylla naka bynta ban wanrah ka jingkylla”.
U Conrad ula ong ka thong bad ka kamram jong ka MSEC kadei ban ai jingmut iaka sorkar haba iadei bad ki skul, ki college, ki jingtei iaki Building, ka rukom siew tulop, ka rukom treikam ki Management jong School bad College kiba don hapoh ka jylla Meghalaya.
Ula ong pynpaw ruh ba ka MSEC kan trei daka jinglait luid naka bynta ban kyntiew iaka pule puthi hapoh ka jylla ha ryngkat bad ki kyndon jong ka NEP 2020 bad ka State Education Policy naka bynta ban wanrah ka jingkylla.
