Shillong, Lber 18 : U President ka Voice of the Peoples Party (VPP) Bah Ardent M Basaiawmoit, ula kam ba kila don bun ngut ki briew kiba la pan ticket naka party ban iakhun ia ka elekshon MDC sha ka Iingdorbar jong ka Khasi Hills Autonomous District Council (KHADC) bad Jaintia Hills Autonomous District Council (JHADC) ban long lashem snem.
Une u Nongialam ka VPP uba dei u MLA ka Nongkrem, ula pyntip ia kane haba kren ha ka ‘rally sngewnguh’ jong ka party ba long hynne ka sngi saitjain ha madan Polo.
Kat kum ka jingong jong u, ha ka por ba u leit rung sha ki Polling Station ha ka 27 tarik Rymphang, ula ioh ia ki phone call na kiba bun ki briew ba kyrpad ban ai ticket iakhun MDC hynrei ula ong sha ki ba kin ap shuwa ban kut ka jingiathep vote.
“Hadien ka 2 tarik Lber, ki briew na ki party bapher bapher kila iakren bad ngi na ka bynta ka ticket. Ka don kawei ka constituency ha kaba haduh 20 ngut ki briew kila kyrpad ban ai ia ka ticket ka VPP. Kane ka dei namar ka jingjur ka lyer ka VPP kaba iaid ha ka thain” ong u Bah Ardent.
“Namar kata, ngi hap ban long kiba stad bad nga la ong ha ki ba lada ki wan sha ka VPP tang ban ioh ticket, nga ai jingmut ia ki ba kan bha iaki ban nym wan sha ka VPP namar kam thikna ba ngin ai ha phi ia ka ticket” ula ong haba kyrpad ia ki nongkyrshan ka party ban iatreilang bad ki Nongialam.
