Guwahati, Lber 16 : Ka NHPC la khmih lynti ba kan sdang ban pyntrei noh ia ka Subansiri Lower Hydroelectric Project ha kine ki khyndiat bnai ki ban wan bad ka ban dei ruh ka hydroelectricity project kaba heh tam jong ka India ha ka thain shatei lammihngi (Northeast).
Ia ki jingmynjur lyngba ki committee bapher bapher la dep ban pyntreikam, kata ha kaba iadei bad ka jingpynwandur ne design bad ka jingtei ia kane ka Subansiri Lower Hydroelectric Project kaba 2,000 MW.
Ka India ka la pynkhreh halor ka jingdawa bording kaba kham jur ha kane ka aiom lyiur, ha kaba na ka liang ka tnat kaba khmih halor ka jinglong jingman ha ka suin bneng ka la ong ba ka ri ka lah ban mad ia ka jingshit kaba jur hapdeng une u bnai Lber bad u bnai Jymmang u ban wan.Ka jingkiew ha ka jingdawa bording la khmih lynti ba kan kiew sha ka 229 gigawatts (GW) ha une u bnai Iaiong u ban wan.Katei ka projek kan lah ban pynbiang ia ka bording sha baroh kawei ka thain kaba la mad ia ka jingeh ha ka liang ka bording.
Ka Subansiri Lower project ka dei kaba nyngkong eh napdeng kiba bun kiwei pat ki dam ia kiba la pynkhreh da ka sorkar ban kyntiew ia ka jingpynmih bording ha Arunachal Pradesh, kaba don haduh 50,000 MW na 145,000 MW baroh na ka bynta ka ri baroh kawei.Haduh mynta, 26 percent na kane la pyndonkam ha baroh kawei ka ri.
Kane ka project ka la wanrah ka jingartatien bad ki jingiakhih pyrshah hapoh Assam namar ka jingsyier halor ka jingshngain bad ka jinglah ban shah ktah lyngba jong katei ka dam.
Ka jingpyntrei ia katei ka projek ka la sangeh noh naduh u snem 2011 haduh u 2019 namar ki jingiakhih da ki kynhun seng bapher bapher ha ka jylla ha kaba ki la pynpaw ka jingsngewkhia kaba jur halor ka jingma na ka jinglah ban shah ktah ha ki jingkhynniuh jumai hapoh ka thain.
Katba na ka liang ka NHPC ka la ong ba kane ka jingsngewkhia lyngba kane ka hydroelectricity project kaba heh tam jong ka ri India hapoh northeast ka dei ka bym shongnia namar ki la shim ia baroh ki lad jingiada.
