Guwahati, Lber 16: Hynnin ka sngi Balang la pynlong ia ka jingpyniathoh shongkurim kynhun ha Tiok Tea Estate Market Hall ha Sonari Assam, ha kaba ki la don haduh 201 jur kiba la iashim bynta ha ka jingleh niam tynrai ban pyndep ia kane ka jingiathoh shongkurim.
Ia kane ka kam la pynbit pynbiang da ka Marriage Reform Committee jong ka Charaideo district ia kaba la aijingkyrshan ruh da ka Hans Foundation.Baroh kine ki shijur ki la kular ban ia shong ia sah ryngkat lang junom ha ka por ba la pynlong ia ka jinglehniam.
Kine ki shijur ki kynthei bad shynrang kiba dei na ki niam rit paid Hindu bapher bapher ki la wan iashim bynta ha kane ka jingpyniathoh shongkurim kynhun hadien ka jingleh niam Vedic ka jong ki.Ia kane ka kam la pyndep ha ka jingiadon ryngkat lang ki nongwan leh niam, ki nongialam niam ha ryngkat ka jingpynieng ia ka ding ban tyrwa ia ki jingainguh.
Ia kane ka jingiathoh shongkurim kynhun la pynlong na ka bynta kito ki longiing ki bym kot bor ban pyndep ia ka kam iathoh shongkurim ha ka rukom kaba kham lut kham sep.Ha kane ka sngi la sakhi ruh ia ka jingwan iashim bynta jong uwei u nongiathoh shongkurim u ba la don 60 snem rta.
Da ki hajar ngut ki briew kumjuh ki kmie ki kpa jong ki nongiathoh shongkurim ki la wan ban sakhi ia kane ka sngi ba kyrpang.Baroh kine ki shijur ki la ioh pdiang ruh ia ka jingai sngewbha na ki nong pyniaid ia kane ka kam.
