Shillong, Lber 13 : Ka Iingkashari Meghalaya High Court hynne ka sngi, kala hukum ban buh ia 10 pyrton ki Central Industrial Security Force (CISF) ki ban pyrrkhing bad tehlakam ia ka jingkhaii beain ia u dewiong.
Kane kala mih hadien ba ka Jylla kala pynpaw ia ka jingdonkam ia ka song pisa ba kot T. 316 klur ban shna ia ki quarter bad ki barrack jong ki 100 pyrton ki CRPF ki ban wanrah hapoh ka Jylla.
Ha ka hukum, ka Iingkashari bala khlieh da u Chief Justice Sanjib Banerjee kala ong, “Ka paw kumba shongnia bha ia ka Iingkashari ban wanrah da 10 pyrton ki CISF ha ka jaka jong ki CRPF. Kane ka long namar, kumba la kdew da ka Sorkar Pdeng, ka CRPF ka treikam hapoh ka jingpyniaid jong ka Tnad Pulit ka Jylla katba ka CISF ka treikam laitluid”.
Halor ka jingkylli na ka Iingkashari, la pyntip ba na ka bynta ka Sorkar Pdeng ba ka CISF ka dei kaba lah ban leh ia ka kam talasi ia ki kali kit mar.
“Haba pynshong nongrim ia ka jingheh ka jaka ha Jylla bad don ruh ki jaka sha ki jaka kyndong ki bym don surok bad ka jingtih dewiong beain bad khaii tuh ka dang iaid, 10 pyrton ki CISF kan biang eh ban talasi ia ki kali bad ban tehlakam ia ka jingkhaii tuh ia u dewiong” ong ka Iingkashari.
“Nalor ba ka CISF ka iaid talasi ia ki kali, khlem pep kan iarap ruh ban tehlakam ia ka jingkhaii ia ki mar khaii tuh bad ban pynthikna ruh ba ki kali kin kit ia ki mar kat kum ka jingkhia bala buh haba iaid ha ki surok ka Jylla bad ki National Highway” kala bynrap.
Ka Iingkashari kala bthah ia u Dr Mozika ban pynbeit ia ki jingdonkam baroh ha kaban phah ia ki 10 pyrton ki CISF sha ki jaka kiba donkam na ka bynta ban talasi bad tehlakam ia ka jingkhaii tuh ia u dewiong ha ka Jylla.
“Kane ka lah ban nym shim por da ki snem namar ka Jylla kala pynkhreh ban sdang noh da ka jingtih marpoh khyndew da ka jingstad saian bad ban ai licence kat kum ka ain” kala ong.
Ka Iingkashari kala buh ban bishar biang ia kane ka kam ha ka 20 tarik u Lber.
