Shillong, Lber 13: U Convener ka Maitshaprang Movement bah Michael Syiem hynne ka sngi nyngkong, ula dawa ba ka sorkar jylla ka dei ban pynsted noh ha ka ban pynkylla thymmai ia ki kyndon ka Meghalaya Succession to Self-acquired Property, Khasi and Jaintia Special Provision Act 1986.
Haba kren sha ki lad pathai khubor u bah Michael ula kam ba ka jingnoh shiliang ka rukom bhah iaka jingdon jingem hapdeng ki khun shynrang bad ki kynthei kala wanrah iaka jingkyrduh kam ki samla hapoh ka jylla bad kane ka plie lad iaki bar jylla ban wanrah ia ka khaii pateng hapoh Meghalaya.
U bah Michael ula iathuh ba hadien 20 snem naduh bala seng iaka Maitshaphrang, kala donkam iaka sorkar jylla ban pynlong aiñ noh ia ka jingia sam ia ka ioh ka kot jong ka ïng ka sem hapdeng ki khun synrang bad kynthei.
“Kum ka seng ka kwah ban ioh jingkyrshan na baroh ki paidbah khamtam na rilum Khasi-Jaintia ban pynbor iaka sorkar ban wanrah jingkylla noh iaka ain Meghalaya Succession to Self-acquired Property, Khasi and Jaintia Special Provision Act 1986 namar kane kan wanrah ka jingiatylli hapdeng ki khun shynrang bad kynthei namar kane kan tei iaki ïng ki sem bad iaka jylla baroh kawei” la ong u bah Michael.
U bah Michael ula ong ba kane ka jingdawa ban pyntreikam ia kane ka aiñ sam bynta sha ki khun shynrang ka long ban lait ruh na ka jingshah lehbeiñ ne knieh jubor ia ka kamai nongkhynraw ki kmie ki kpa da ki kur.
Ula ong ba lada wanrah ka jingkylla iaka Meghalaya Equitable Distribution of Self Acquired and Ancestral Property Act, kane ka ain lada ka lah urlong kan long ruh ka jingpynkupbor ïa ki khun shynrang ban khlaiñ ka tyrpeng ban kit ban bah ia ka longïng longsem ynda ki la shongkha.
Shuh shuh ula ong ba ka jingbym ïoh bynta lang u khun shynrang ïa ka kamai nongkhynraw ki kmie ki kpa ka ka pynlong ïa ki ban ym sngewtrai ia ka ïing ka sem bad wat ia kamai kajih ruh.
