Shillong, Lber 10: Ki Pulit ka jylla ki dang thwet jur ia ar ngut ki briew kiba la suba jur ba kidei kiba donkti ha kaban pyniap dusmon ia u Bah Omeka Myrthong da kaba khrai khlieh, khet ia ka kti bad ban tep ia ka met harud ka Pung Umiam.
Haba iakren bad ki nongthoh khubor hynne ka sngi, u DIG (Eastern Range) u Davis N R Marak ula iathuh ba kila don ar ngut ki paralok jong u Bah Omeka kiba la don ryngkat lang bad u hynrei kine ki ar ngut haduh mynta kila phet rieh.
U DIG ula pyntip ba ki pulit kila rejistar kes halor kane ka jinglap ia ka metiap jong u Bah Omeka namar ka jing suba jur ba une u rangbah ula shah pyniap.
Ha ka sngi Palei, la leh iaka Post-Mortem ha Umiam bad ha ka jingtohkit la shem ba la ujor sha ki pulit jong ka Lumdiengjri haka 3 tarik u Lber halor ka jingjah jong une u rangbah.
“Une u rangbah ula jah naduh ka 26 tarik u Rymphang hynrei la wan ujor sha ki pulit haka 3 tarik u Lber” la iathuh u DIG.
Halor ka jingbuddien ia katei ka jingujor, ki pulit jong ka Lumdiengjri PS kila shem ba une u Bah Omeka ula don lang khatduh eh bad ki ar ngut ki paralok ia kaba la suba ba kila ia dih kyiad.
Une u heh pulit, ula ong, haba ioh jingtip halor katei ka jingjia, la ujor da ka Zero FIR ha Umiam PS bad ia kane ka Zero FIR lah ban ujor ha kano kano ka police station, wat lada ka jingjia kam dei satia kaba la jia hapoh u pud u sam jong katei ka police station.
Hadien ba la dep ujor iaka Zero FIR ha Umiam PS, la rah noh ia kane ka case sha Lumdiengjri PS bad ka jingtohkitmynta ka dang iaid shakhmat bad ka jingthwet ia ki ar ngut kiba la phet rieh ka dang iaid haduh mynta.
Kum ban shu kdew, haka 6 tarik u Lber, la lap ia ka khlieh jong u Bah Omeka na ka pung Umiam bad tang hadien 2 sngi la lap sa ia ka kti kaba la per ha katei ka pung bad ha kane ka juh hi ka sngi, la lap ia ka met kaba sah jong u rangbah uba la shah pyniap na kawei ka jaka kaba don hajan ka pung Umiam.
