Shillong, Risaw 05 : Ka Khasi Students’ Union (KSU) ha ka sngi Nyngkong kala pynsngew ia ka jingshitom jong u nongialam Pynkmenlang Sanmiet, uba la don ha phatok naduh ka 19 tarik Nailar ba don ha rally thuk thuk ka KSU, bad ong ba ka Sorkar kan hap shim jingkitkhlieh lada jia eiei ia u.
U Environmental Secretary ka KSU samla Shiningstar Kharbihkhiew haba iakren bad ki nongthoh khubor ula iathuh ba u samla Pynkmen, uba khie ka jingshitom phlei snam na khmut, ula thiah sumar ha Civil Hospital ha ka 11 tarik Naitung bad la bthah ia u ban leit leh surgery ha Bethany Hospital ha u bnai Nailur.
“Ia ka surgery la buh ban leh ha u Nailur, hynrei u dang don ha ka jingshah set phatok bad um shym la iohlad satia ban leit” iathuh u samla Shining.
U iathuh ba ki Pulit kila ialam ia u Vice President sha Civil Hospital ban leh check-up ha ka 16 tarik Nailur bad leit biang ha ka 3 tarik Risaw namar ka blood pressure. Ki doktor ha Civil Hospital kila phah rah ia u sha NEIGRIHMS ban khmih bniah bha, hynrei ula jied ban bteng ia ka jingsumar ha Bethany Hospital.
U samla Shining u iathuh ba ka pule dangle jong u samla Pynkmen ruh kala shah ktah jur. U dang leit pule PhD ha ka Law ha NEHU bad ula duh ia ka aiti ia ki jingthoh ba dei ban ai man u bnai kaba dei jong u bnai Jylliew bad Nailur.
Ka Seng ka iathuh ba yn sa pan ia ka bah jamin ha ka 6 tarik Risaw. “Ngi shaniah ha ka Iingkashari ban ai ia ka rai kaba biang tam na ka bynta u nongialam jong ngi” ula bynrap.
Haba kynnoh ba kane ka jingkem ka dei kaba iasnoh bad ka jingpyrshah ka KSU halor ki 5tylli ki ishu, kynthup ka project Shree Cement, u samla Shining ula buh jingkylli balei ba kam shym la don ka jingkem bad jingpynshitom pyrshah ia kito kiba pynthut ia ka public hearing.
“Ngi la ai ia ka ejahar hapoh ka Crime Branch pyrshah ia kito kiba kawang maw, pynjulor ia ka surok bad pynthut ia ka public hearing. Balei ba haduh mynta ym pat shym la kem iano iano ruh” ula buh jingkylli.
“Ka ain i kumba ka trei trei ia ki rit ki ria. Ka Sorkar ka pyrshang ban iuhroit ia ka hok u paidbah da kaba pyndonkam da ka bor pyrshah ia kiba tlot” ula ong.
Ka KSU kala ong ba kan pyniaid shakhmat bad ki jingiakhih halor kine ki ishu.
