Shillong, Risaw 05 : U MLA ka North Shillong bah Adelbert Nongrum ula dawa ban tohkit da ka CBI halor ka jingkhynra ki Pulit ia ka Ophis ka KSU ha ka 19 tarik Nailar haba kdew ia ka jingsiat pathar ia ki tyndong lyer pynsat khmat hajan ka Hospital, ka jingwan rung ki Pulit tap durkhmat khlem ki nameplate bad ka jingkren ia ki ktien khlem akor.
Ha ka dorkhas bala aiti sha u Symbud Myntri Rangbah ba khmih ia ki kam Pohiing (Police) Bah Prestone Tynsong ha ka sngi Nyngkong, u bah Adelbert ula ong ba ka Sorkar ka dei ban thung ia ka jingtohkit kaba shai lem kumta kan pynbor ia u ban mudui sha ki bor ka ain ba kham halor.
Ia ki kot ki sla lah aiti sha ki phra tylli ki borkhmih ba kynthup sha u Myntri Rangbah, u Chief Secretary, Director General of Police (DGP), bad ka National Human Rights Commission (NHRC) bad ka Meghalaya Human Rights Commission (MHRC).
Kat kum ka kaiphod Seng Samla Jaiaw Pdeng, kumba 15 round ki tyndong lyer pynsat khmat la siat ha kane ka jaka sah briew kaba don marjan ka H Gordon Robert Hospital, kaba buh ia ki nongpang ha ka jingma bad pyn rit mynsiem bad pynshitom ka ring mynsiem hapdeng ki nongshongshnong.
U Bah Adelbert u iathuh ha ki lad pathai khubor ba ki Pulit kila iaid lait ia ki bor shnong.
Ula kynnoh ruh ba ki video bala rung na kateu ka jaka ka pyni ba ki Pulit kila pyndonkam iaki ktien khlem akor pyrshah ia ki nongkitkam ka SSJP bad pyni bor ruh ia ki samla ka thain.
“Ki jaka sah briew kim dei ki madan thma, bad ka jingwan pynibor ia ki nongshongshnong jong ngi ka dei ka bym lah satia ban pdiang” ula ong.
Ka dorkhas kala kdew ruh ia ka jingbym iahap ka rukom treikam ki Pulit-katba ki Pulit kila jah hakapor ba iaid rally ka KSU ha ka por mynsngi jong ka 19 tarik Nailar, la lum lang ia ki Pulit ba tap durkhmat ha kapor mynmiet ban pynlong ia ka jingkhynra sha ki jaka sahbriew.
Haba kdew ia ka jingkulmarThem Metor ha u snem 2018, u bah Adelbert ula ong ba ki shnong kiba hap hapoh ka 17-North Shillong kila sakhi ia kijuh ki jingsiat pathar ia ki tyndong lyer pynsat khmat sha ki jaka sah briew.
“Kiba bun ki samla khasi kila shitom shirta, don sah ka jingsyier kynthup ki briew kiba la duh wat ia ka khmut bad ki bynta jong ka met namar ka jingbthei ki jingsop nalor ba bun ki nongshongshong kila mynsaw na ka jingshei ki kuli pellet” ula ong bad bynrap ba haduh mynta kam shym la don ka jingsiew bai lutksan ne jingiarap ia kine kiba mynsaw.
