Agartala, Lber 10: Hapdeng ki jingjia jong ka jingiakynad sain hima ha Tripura, ka kynhun jong ki phra ngut ki dkhot ka parliament kin pynlong ka jingleit jurip ia kane ka jylla ba la synshar da ka BJP mynta ka sngi Thohdieng bad lashai ka sngi Saitjain ban bishar bniah ia ka jinglong jingman bad ban iamir jingmut bad ki briew kiba la shah ktah.
Ki nongialam na ka Seng Congress bad ka CPI-M ki la ong ba kane ka kynhun ki dkhot ka parliament kaba kynthup ia san ngut ki MP ka Lok Sabha bad laingut ki MP ka Rajya Sabha bad ki ban phiah sha ki lai kynhun kin leit jurip ia kito ki shnong kyndong bad ki jaka sor kiba la shah ktah ha ki jingiaumsnam ha ki laitylli ki district ka jylla, kata ha West Tripura, Sepahijala bad Gomati.
Ki MLA bad ki nongialam ka Congress bad ka CPI-M kin synran lang ia ki dkhot ka parliament hadien ba kin leit jurip sha kito ki jaka kiba la shah ktah ha ki jingiaumsnam.
Kine ki dkhot ka kynhun ka parliament ki kynthup ia u P.R. Natarajan, Gaurav Gogoi, Ranjita Ranjan, A. A Rahim, Abdul Khalique, baroh ki dkhot ka Lok Sabha nalor u Bikash Ranjan Bhattacharya, Vinay Viswam bad u Elaram Karim.
Na ka liang u Secretary ka Tripura CPI-M u Jitendra Chowdhury u la ong ba ki la don haduh kumba shi hajar tylli ki jingjia iaumsnam naduh ka 2 tarik mynta u bnai bad da ki hajar ngut ki briew kaba kynthup ia ki kynthei bad ki khynnah ki la hap ban phet krad na la ki jong ki iing ki sem bad ban shongrieh sha ki khlaw ki btap bad sha kiwei pat ki jaka shabar ka jylla.
“Ki bor pulit ki la shu kylla long ki nong peitkai bad kyntait ban rejistar FIR.Katto katne ki briew kiba la shah kem ki la ioh lait noh tang hadien khyndiat por,” ong u Chowdhury lyngba ki lad pathai khubor.
U la ong ruh ba kumba laingut ki briew ki la shah pyniap katba kumba 200 ngut kiwei pat ki la ngat ha ki jingmynsaw na ki jingiaumsnam bapher bapher hadien ba la pynbna ia ki nongjop ha ka ilekshon kaba la long ha ka 16 tarik u Rymphang ba la dep ha ka 2 tarik mynta u bnai Lber.
Kiba bun bah ki jingdon jingem kaba kynthup ia ki rep diengjri, ki dukan, ki jaka treikam, ki kali bad ki iing ki sem ki la shah pynjulor bad shah thang dusmon ha kine ki jingjia jong ka jingiaumsnam kiba dang iai bteng haduh mynta, kynnoh u Chowdhury.
