Guwahati, Lber 9: U heh nongialam jong ka Seng All India Majlis-Ittehadul Muslimeen (AIMIM) u Asaduddin Owaisi u la kynthoh pyrshah ia u nongialam ka Nationalist Congress Party (NCP) u Sharad Pawar halor ka jingai jingkyrshan ia ka sorkar synrop ba la ialam da ka NDPP-BJP ha Nagaland.
Utei u MP na Hyderabad u la kynthoh ia ka NCP halor ka jingai jingkyrshan ia ka sorkar synrop bad ka BJP bad ong ba u Sharad yn khot da ka team B bad ba um lah ban kam halor ka jinglong secular. “Ngam ju kyrshan ia ka sorkar BJP bad ngan ym kyrshan da lei lei ruh, hynrei kane ka dei ka sien kaba ar ba ka NCP ka la aijingkyrshan ia ka BJP bad ka lah ruh ban ym dei ka sien kaba khatduh.”
Hadien ba u incharge ka NCP hapoh Northeast u Narendra Verma u la pynpaw ba u Sharad Pawar u jied ban pdiang ia ka jinglong nongialam jong u Myntri Rangbah (CM) Neiphiu Rio na ka bynta ka jingbit jingbiang bad ka jingbha jong baroh lang ha ka jylla Nagaland, kumta ruh na ka liang u Asaduddin Owaisi u la pynmih ia katei ka jingkynthoh. Na ka liang u nongialam ka NCP ha Nagaland ruh u la ong ba u Sharad Pawar u la mynjur ia kane ka jingai jingmut ban pyniasoh bad kiwei pat ki party sain hima na ka bynta ban aijingkyrshan ia u CM Neiphiu Rio.
Katkum ka jingpynpaw jong ka seng NCP, u MLA ba dang shu shah jied thymmai jong kane ka party lem bad ka unit jong ka hapoh ka thain ki ngeit ba ka party ka dei ban dei ka bynta jong ka sorkar na ka bynta ka jingbit jingbiang jong ka jylla.Hynrei ia ka seng BJP kaba la jop 12 seat ha kane ka ilekshon kaba dang shu ym shym la la pynpaw ei ei da ka seng NCP.
Lah ban kdew ba hapoh ka kynhun myntri jong u Neiphiu Rio ki don san ngut ki myntri na ka seng BJP.U Rioh u la ioh ia ka jingjop ha ka sien kaba san ha kane ka ilekshon assembly kaba dang shu dep.Ka NCP ka la jop hynniew tylli ki seat na ki 12 tylli kiba ka la pyniakhun.
