Shillong, Jylliew 29: U Myntri ka tnad pynroi nongkyndong Bah Hamletson Dohling ula ong ba skhim Deen Dayal Upadhyaya Grameen Kaushalya Yojana (DDU-GKY) kala plie lynti ia ki samla ka jylla ba kin lah kyrshan ialade bad ban ieng hala ki jong ki kjat.
U Myntri ula kren ia kane ha ka CxO Meet 2022 jong ka Deen Dayal Upadhyaya Grameen Kaushalya Yojana (DDU-GKY) Meghalaya, kaba long hynne ka sngi ha State Convention Centre, Shillong.
Haba kren kum u kongsan, u Bah Hamletson ula ong ba ka thong jong ka Ministry of Rural Development ka Sorkar India haba pynbna ia ka DDU-GKY ha u snem 2014, ka long eh ha kaban pynkylla ia ki samla na nongkyndong kum ki samla ba don la ka jong ka kamai ka kajih ne ba lah ieng hala ki kjat bad ruh ban long ki nongtrei kiba lah ban iohkam ha kylleng ki Ri ka pyrthei.
U Bah Hamletson ula ong ba ka DDU-GKY kala pynlah ia ki samla ka Jylla ban shim ia ki kabu bala plie lynti da kane ka rynsan kaba lah ban aikam aijam ia ki.
Ha kane ka sngi, u Myntri ula pyllait paidbah ruh ia ka Skill Gap Analysis Report bad aiti ia ki khusnam Best PIA sha ka Wazir & Advisors Pvt Ltd nalor ka jingpynkup burom ia ki riew don sap ha ka trei ka ktah (skill Icon) jong ka Jylla.
Kiwei pat kiba la ai jingkren ha kane ka prokram ki kynthup ia u Bah T Lyngwa, Principal Secretary, ka Tnad C&RD ka Jylla ka C. Tenzing, Nongmihkhmat ka MoRD bad Dr R Murugesan, Regional Director ka NIRD&PR.
