Shillong, Jylliew 29 : Palat 3000 ngut ki samla pule ka Jylla kila pyndep ia ka jinghikai pyntbit (training) halor ka Soft Skill lyngba ka Aspire Meghalaya ha baroh ki 12 tylli ki District ja Jylla.
Ia kane ka Aspire Meghalaya la pynlong da ja Tnad Sports & Youth Affairs ka Jylla ha ryngkat ka jingsnohkti ka Tnad Pule Puthi ka Jylla. Ia kane ka prokram la pyniaid da ka Avenues, Shillong.
Ka jingthmu jong kane ka program ka long ban pynkhreh ia ki khynnah pule shwa ba kin rung sha ka jylli ka wad kam wad jam bad ruh ban pynshlur ia ki ha ka ban sei ia ki sap ki phong khnang ba yn ioh ban pyniasoh ia ki bad ki scheme bapher bapher jong ka sorkar jylla.
Ha kaba iadei bad kane, 3182 ngut ki khynnah pule na ki 15 tylli ki skul ha ki distrik bapher bapher hapoh ka jylla ki la ioh pdiang ia ka soft skill training bad talent identification program lyngba ka Aspire Meghalaya kaba la pynlong ha u bnai Jylliew mynta u snem.
U Myntri Rangbah jong ka jylla, u Conrad K. Sangma u la plie pyrda ia ka Aspire Meghalaya ha u bnai Lber jong une u snem kum kawei na ki jingpyrshang hapoh ka Meghalaya Youth Engagement and Training Programmes. Haba kren shaphang kane, u la ong, “Ka Aspire Meghalaya ka long ka program kyrpang na ka bynta ki khynnah samla jong ka jylla jong ngi. Ka long ka rynsan ha kaba ki lah ban ioh jinghikai halor ki jingpyntbit bapher bapher, khnang ba kin ioh kot sha ka jingjop ha ka lawei jong ki.”
Shi bynta na ka jingthmu jong ka Aspire Meghalaya ka long ban ai lad ia ki khynnah samla ban pynsngew ia ki jingiakynduh bad jingangnud jong ki ha ka liang ka imlang sahlang, ka pule puthi bad khamtam eh ha kaba iadei bad ka lawei jong ki.
Ha kaba ia dei bad kane, la pyniaid ia ka Meghalaya Youth Survey ha kaba haduh palat 50,000 ngut ki khynnah pule jong ka jylla ki lah ioh ban shim bynta da kaba ai ia ki jubab jong ki lyngba katei ka survey.
Ka bynta kaba ar jong ka Aspire ka kynthup ia ka jingai training ia ki khynnah pule ha ki skul jong ki ha ka liang ki soft skill lyngba ki workshop ba ai jinghikai ha ka jingshlur (Confidence), ka rukom pyrkhat shai ia ka lawei (Clarity), ka rukom pyniadei bad kren para briew (Communication) bad ka jinglah ban iaid shaphrang lyngba ki jingeh bad jingiakynduh bapher bapher (Emotional Resilience).
U samla Sameki Syngkon, uba shong klas 12 hapoh ka skul Ummulong Presbyterian Higher Secondary School, u la ai mynsiem ia ki para samla da kaba ong, “Baroh ngi long kiba stad bad ngi don la ki jong ki sap, hynrei kum ki khynnah samla bunsien ngi lehrain lane tieng ban pyni ia ki. Nga ngeit ba baroh na ngi, kiba la shah hikai lyngba ka Aspire Meghalaya, ngi la ioh jingmyntoi shibun. Namar kata, nga kyrpad ia ngi lang baroh ban ngin pynduh ia ka jinglehrain jong ngi ban pyni ia ki sap kiba ngi don. Haba ki nonghikai ki khot ia ngi, ngim dei ban artatien hynrei ngi dei ban mih shakhmat da ka jingshlur.”
Ha ka jingkren ha kawei na ki graduation program, u Bah Salanbor Kamar, SSA office, Education Department, u la iaroh ia ka jingtreishitom ki nongpyniaid jong kitei ki skul bad ka Avenues. U la pynshlur ia ki khynnah da kaba ong, “Ia kane ka program, la pynkhreh kyrpang na ka bynta jong phi, ban iarap iaphi ban sngewthuh bad ithuh shai ia ki sap bad ki jingthmu kiba phi don, bad ruh ban wad bad jied ia ki lynti kamai jakpoh ba biang tam na ka bynta ka lawei jong phi shimet.”
U la ban ruh halor ka jingkloi jong ka District Sports Office hapoh ka Sports & Youth Affairs Department, ban iarap ai mynsiem bad kdew lynti, khamtam eh ia kito kiba thrang ban pyntbit ialade ha ka liang ki jingialehkai sports, da kaba kyrmen ba ka jylla kan iohi bun ngut ki nongmihkhmat ha ki rynsan bapher bapher hapoh ka Ri India bad ka pyrthei ruh kumjuh.
Kawei na ki jingthmu ba kongsan jong ka Aspire Meghalaya ka dei ban iarap khyllie ia ki sap ki phong kiba ha rieh jong ki khynnah samla ka jylla.
Nalor ki workshop ba pynlong ha ki skul, ki don ruh ki rynsan ha kaba ki khynnah ki lah ban pyni ia ki sap ki phong jong ki. Ki skul ki don ka bynta kaba kongsan ha kaban jied ia ki nongmihkhmat sha ka distrik ha kaba ki don. Kin don ruh ki District Talent Committee ki ban jied pat ia ki nongmihkhmat jong kawei pa kawei ka distrik sha ka rynsan iakop pyni sap pyni phong jong ka jylla, ha kaba u paidbah jong ka jylla hi un ioh shim bynta ban jied ia ki nongjop ki ban yn sa ithuh paidbah kum kita ki ‘Aspire Meghalaya Stars’.
Ki 15 tylli ki skul kiba la pyndep ia ka training jong ka Aspire Meghalaya haduh kane ka sngi ki kynthup ia ka Government Girls’ Higher Secondary School, Shillong (East Khasi Hills); Williamnagar Government Higher Secondary School bad Green Yard Higher Secondary School (East Garo Hills); Baghmara Government Higher Secondary School (South Garo Hills); Seinjat Tuber Higher Secondary School, Khliehriat Higher Secondary School bad Ambrose Memorial Secondary School (East Jaintia Hills); Government Girls Higher Secondary School, Ummulong Presbyterian Higher Secondary School, Sawlyngdoh Higher Secondary School bad St. Dominic Higher Secondary School (West Jaintia Hills); Nirupama Memorial Secondary School, Rangsakona Higher Secondary School, Ampati Government Higher Secondary School bad St. Claret Higher Secondary School (South West Garo Hills).
Lah ban ong ruh ba ka Aspire Meghalaya ka thmu ban leit sha palat 60 tylli ki skul hapoh ka jylla bad ban ai jinghikai ia palat 10,000 hajar ngut ki khynnah pule hapoh une u snem.
