Agartala, Lber 05: U Myntri Rangbah (CM) ka Assam u Himanta Biswa Sarma u la ong ba ia ka mat ba la wanrah da ka Tipra Motha Party (TMP) donkam ban iamir jingmut da ka sorkar pdeng bad ka sorkar thymmai ka BJP ha Tripura.
U Sarma u la ong ba ka jingiakren hapdeng ka BJP bad ka TMP ka lah ban bteng biang hynrei ka dei ban long katkum ki kyndon kiba iadei bad ki riti synshar khadar, bad ym ha ka nongrim ban phiah ia ka jylla Tripura.
Ia ki mat kiba iadei bad ki trai shnong riewlum yn pynsngap bad iamir jingmut, ong u CM ka Assam sha ki lad pathai khubor ha Agartala hynnin ka sngi Saitjain.
“Ka result kaba mih na kane ka ilekshon ka pyni ia ka jingshaniah u paidbah hapoh ka jingialam u PM Narendra Modi. Ka BJP ka angnud ban iatreilang bad baroh na ka bynta ka jingmyntoi jong baroh, ” Ong u Sarma.
U CM ka Assam u la pynlong ka jingleit jurip ia ka Tripura hynnin ka sngi Saitjain ha ka sien kaba nyngkong hadien ba ka BJP ka la wanphai biang ha ka bor ha ka jylla.
U Sarma uba hashwa ka jingpynlong ia ka ilekshon assembly u la pynlong bunsien ia ka jingiakren bad u khliehduh ka TMP u Pradyot Bikram Manikya Deb Barman, u la ong ba ka jingiakren ka lah ban bteng hynrei ngin ym lah ban iakren ha kaba iadei bad ka jingdawa la ka jong ka jylla na ka bynta ki riewlum ka Tripura ne ka ‘Greater Tipraland State’.
Nalor kata u la ong ruh ba dei lyngba ka jingsynshar bakhuid jong u PM Modi ka seng BJP bad ki kynhun synrop jong ka ki la ioh ia ka jingjop kaba donburom ha kiba bun ki jylla jong ka thain Northeast.
U Sarma uba la pynlong ia ka jingiakren bad ki nongialam ka BJP Tripura halor ka jingthaw ia ka sorkar thymmai ba la lamkhmat da ka BJP u la ong ba ka jingialang pyntian smai ha Tripura kan long ha ka 8 tarik mynta u bnai.
Ka seng sain hima ba pawkhmat jong ki trai shnong riewlum ka Tripura ka TMP, kaba la isi dawa ban kyntiew kyrdan ia ka Tripura Tribal Areas Autonomous District Council (TTAADC) sha ka jylla ba pura da kaba pynurlong ia kata kaba ki khot ka ‘Greater Tipraland State’ lane la ka jong ka jylla ba pura hapoh ka Arhticle 2 bad 3 jong ka ritii synshar ri ne Constitution ka la mih iakhun ha kane ka ilekshon assembly ha ka sien kaba nyngkong bad jop 13 tylli ki seat.
