Shillong, Lber 03: U kyrtong ka UDP na Sohra u Bah TW Chyne ula phah da ka jingthoh sha u Chief Electoral Officer ka jylla ban kyrpad ban phah niew biang sa shisien iaka Vote jong ka Sohra Constituency namar ka jingbym sngewhun iaka rukom niew iaka vote.
Katkum ka shithi kaba la phah da u Bah Titosstar uba long ruh u Chief Executive Member ka KHADC u Bah TW Chyne ula pynpaw ba ym sngewhun satia ha kaba iadei bad ka jingpynbna iaka resol jong ka elekshon MLA ha Sohra Constituency haka 2 tarik u Lber katkum ka jingkhein kaba ula lap bad ula kyrpad ban niew biang iaka Vote.
Halor kane ka jingkyrpad, naka liang u Joint Chief Electoral Officer u Bah AS Mukhim ula bthah ia u Sub Divisional Officer (El) Sohra Civil Sub Division ban lum ia ka jingialang ba u nongujor bad ban pynsngewthuh ia u kyrtong ia kiba bun ki kyndon bad ki jingbthah jong ka ECI ha kaba iadei bad ka jingniew Vote bad ka jingpynbna ia ka Result bad ban pyni ia ki kot ki sla bad ki jingtip sha u nongujor.
La bthah ruh ba u ARO uba khmih ia ka kam udei ban don lang ha katei ka jingialang bad dei ban pyntip bad ban phah iaka ‘Proceeding’ ia kaei kaba mih na katei ka jingialang sha ka ophis jong u CEO, Meghalaya.
