Tyrwa ka BJP ia ka jingkyrshan ban thaw Sorkar
Shillong, Lber 02 :Hadien ka jingioh khur ia ka jingjop kum ka party ba don bun eh ki MLA, ka National People’s Party (NPP) kala pynkhreh ban leit kam ia ka hok ban thaw iaka Sorkar thymmai ha Jylla lashai ka sngi thohdieng.
Ka khubor napoh ka Party hynne ka sngi palei, ka pyntip ba ka kynhun ba ialam da u National President ka NPP Conrad K Sangma, kan sa leit iakynduh lashai mynstep ia u Lat ka Jylla ha Raj Bhavan ban kam ia ka hok ban thaw ia ka sorkar ba thymmai.
Kila pynpaw ba ka jingiakren kala iaid shaid shaid hapdeng ka NPP bad kiwei ki party ba iasngewthuh jingmut ba kin ai ia ka jingkyrshan.
Ka United Democratic Party (UDP), kaba wan ba-ar ha ka jingdon ki MLA ba kot 11 ngut, kam pat shym rai satia la kan ai jingkyrshan ne em ia ka NPP.
“Ngin sa shong jingialang ban shim ia ka rai halor kane ka kam” ong uwei u nongialam baa rangbah jong ka UDP haba iakren lyngba ka phone.
Ka Bharatiya Janata Party (BJP) kaa tyrwa dalade ban kyrshan ia ka NPP ha kaban thaw ia ka Sorkar ba thymmai hapoh ka Jylla. Kane ka jingtyrwa kala wan ha ka dur jong ka shithi bala phah da u President ka BJP Meghalaya Bah Ernest Mawrie sha u Conrad k Sangma.
Kat kum kane ka shithi, u bah Ernest ula pyntip ba kane ka jingtyrwa ban kyrshan kala wan na u President ka BJP sengkmie u JP Nadda.
Lah ioh jingtip ruh ba ki dang don sa ki kyrtong shimet kiba la pynpaw ia ka jingkloi ban iatreilang bad ka NPP ha kaban thaw iaka Sorkar ha Jylla.
Shuwa kane, u National President ka NPP Conrad K Sangma hadien ba shah jied biang kum u MLA ka South Tura, ula ong “Nga ai khubei ia ki paidbah ka Jylla kiba la ai ka jingshaniah ha ka NPP”. Ula ong ba ka party kan sa shim rai kumno ban iaid shakhmat hadien bala dep pynbna ia ka result hynne ka sngi.
