Shillong, Lber 01 : Ka kynta…ka minit…ka second…kala nang iaid shajan sha ka kynta niew vote bad ka lawei jong baroh 369 ngut ki kyrtong ba iakhun ia kane ka elekshon, kan shong ha ka rai u paidbah ka ban sa iatip paidbah lashai ka sngi ka 2 tarik u Lber.
Ka jingianiew ia ki vote kan sdang ha ka por 8 baje mynstep ha baroh 13 tylli ki jaka niew vote ha baroh kawei ka Jylla.
Ia ka jingiathep vote la pynlong ha ka 27 tarik bad ka jingpoi jong ki nongthep vote kala kot haduh 85.51 percent.
“Baroh ki jingdonkam la dep ban pynbeit na ka bynta ka jingniew vote lashai ka sngi. Ngi don 13 tylli ki jaka niew vote ha baroh kawei ka jylla-12 tylli ki nongbah jong ki District bad kawei ka Sohra Sub-Division” ong u Chief Electoral Officer (CEO) Bah FR Kharkongor hynne ka sngi Balang.
Ula iathuh ba haduh 22 pyrton ki bor pahara CAPF lah dep ban iai buh ha Jylla ban pynthikna iaka jingshngain ba 24 kynta haba iadei bad ka strong room kiba buh ia ki EVM jong ki 3419 tylli ki Polling Station jong ki 59 tylli ki Constituency bad kine ki pyrton kin iai don ha Jylla haduh ka 4 tarik Lber.
U CEO ula pyntip ba kin don haduh 383 kylla ka jingniew vote, ha kaba 9 kylla kan dei kaba heh duh bad kane ka dei ka Mawlai constituency ha East Khasi Hills bad kaba duna eh ka dei 4 kylla jong ki constituency kum ka Dalu ha West Garo Hills District.
“Ka jingniew vote ha baroh 13 tylli ki centre kan sdang ha ka por 8 baje mynstep bad ka jingniew kan sdang shuwa da ki postal ballot ha ka 30 minit bas dang bad sa pynbud da ka jingniew ia ki vote na ki EVM” ula ong.
U CEO bala synran da u DEO bad SP kila leit ban jurip hi dalade ia ka rukom pynkhreh ia ka jingniew vote ha East Khasi Hulls Counting Centre ha madan Polo, Shillong, kaba don haduh 14 tylli ki jaka niew, kawei ia kawei pa kawei ka constituency.
Ka West Garo Hills Counting Centre kan don haduh 11 tylli ki assembly constituency bad kan dei kaba ar na kiba heh duh na ki jaka niew vote hapoh ka Jylla.
Ka Election Commission kala buh haduh 27 tylli ki counting observer bad palat 500 ngut ki micro observer kin leit ban synran ia ki counting observer ha kawei pa kawei ka miej.
