Shillong, Lber 01: Ka ïing dorbar jong ka Khasi Hills Autonomous District Council (KHADC) hynne ka sngi kala pynlong ka jingsngap jar don burom ba shi minit kum shi bynta ban kynmaw sngewlem halor ka jingkhlad noh u dkhot barim ka district council u bah HDR Lyngdoh (Bam Kwai Dwar U Blei).
Ia kane ka ïing dorbar jong ka KHADC kala leh hashuwa ban pynwai noh iaka dorbar mang tyngka kaba la sdang mynta ka sngi ka 1 tarik Lber 2023.
Haba kren hapoh ka ïng dorbar u Chief Executive Member (CEM) ka KHADC bah Titosstarwell Chyne ula pyntip ba u bah HDR Lyngdoh (Bam Kwai Dwar U Blei) udei u dkhot jong ka district council ha u snem 1999-2004, 2004-2009 bad naduh 2009-1014 bad ula hiar shuki noh u dkhot ka KHADC ha ka 23 tarik Nailur 2015.
U bah Titos ula ong ba nalor ba ula dei teng u dkhot ka KHADC, u bah HDR Lyngdoh (Bam Kwai Dwar U Blei) ula bat teng ruh kum u myntri ka tnat kam pohïng bad myntri jong kiwei ki tnat hapoh ka sorkar Meghalaya.
Ula ong ba kum u dkhot ka KHADC u bah HDR Lyngdoh (Bam Kwai Dwar U Blei) ula leh shibun ki kam ki ban wanrah ka jingmyntoi iaka district council, iaki paidbah bad iaka jylla baroh kawei.
“Naka liang ka district council ka phah ka khubor sngewlem ia ka ïng ka sem jong u bah HDR Lyngdoh (Bam Kwai Dwar U Blei)” la ong u bah Titos.
