Shillong, Lber 01: Ka Khasi Hills Autonomous District Council (KHADC) hynne ka sngi kala mynjur iaka mang tyngka ba lai bnai, kaba kot haduh T. 46.27 crore, ka ban treikam naduh 1 tarik Iaiong haduh 20 tarik Jylliew 2023.
Ia kane ka mang tyngka la mynjur hapoh ka ïngdorbar thaw ain jong ka KHADC bad kane ka mang tyngka kaba T.46.27 klur kadei tang naka bynta lai bnai namar bun ki daw ka district council kam lah ban wanrah ia ka mang tyngka ba pura naka bynta u snem 2023-2024.
Haba wanrah iaka mang tyngka hynne ka sngi u chief executive member (CEM) ka KHADC u bah Titosstarwell Chyne ula pyntip ba ka mang tyngka kaba T.46,27,16,190 kan treikam naduh 1 tarik Iaiong haduh 20 tarik Jylliew 2023.
Haka jingkren u bah Titos ula pyntip ba iaka mang tyngka ba pura kata jong u snem 2023-2024 yn sa shim biang ha kawei pat ka dorbar ka ban sa long jong ka district council.
Ula ong ba kane ka mang tyngka ba tang lai bnai kan ailad iaki dkhot ban pynbit pynbiang iaki kot ki sla haba iadei bad ka jingpynlut bad kumjuh ruh kane kan plie lad ban pynbit pynbiang iaki jingdonkam khamtam haba iadei bad ka jingsiew tulop sha ki dkhot, ki officers bad kiwei kiwei de ki nongtrei ka KHADC nalor ka jingsiew iaki bai bam tymmen sha kito kiba la shong thait.
Shuh shuh ula bynrap ba iaka mang tyngka ba lai bnai la kynthup lang iaka jingpynlut naka bynta ki kam pynroi kaba ka District Council kala ioh naka 15th Finance Commission bad ia kane ka mang tyngka kaba mynta la leh namar ka CAG ka dang lum jingkhein haba iadei bad ka jingpynlut ka Council.
“Namar kane ki ophisar ka KHADC kin ioh por ban pynbit pynbiang iaki jingdonkam jong ka CAG kaba dang lum jingkhein haba iadei bad ka jingpynlut ka District Council bad ki don bun ruh ki MDC kiba iakhun iaka ilekshon MLA 2023 bad hadien kine baroh ki ophisar ruh kin sa lah ban pynbiang daka mang tyngka ba pura” la ong u bah Titos.
Haba iadei bad ka mang tyngka ba T.46.27 klur, la mang T. 9,29,73,230 shaka General Administration Department, T.15,37,630 shaka Law Department, T.2,11,70,910 shaka Revenue Budget & Finance Department, T.2,38,94.710 shaka Forest Administration Department, T.1,45,17,810 shaka Administration of Justice & Judicial Department, T.1,86,66,370 shaka Legislative Department, T.3,40,370 shaka Education Department, T.27,53,18,430 shaka Civil Works & Development Department bad T.1,42,96,730 shaka tnat Enforcement Scheme ban iada iaki Tribal Land.
