Agartala, Lber 1: Na ka liang ki bor pyniaid ilekshon ki la pynjur ia ka jingpahara hashwa ka jingpynbna ia ka result ka ban mih na ka jingpynlong ia ka ilekshon assembly ha ka jylla Tripura, Nagaland bad Meghalaya khnang ban pynthikna ia ka shongsuk shongsain.
Ia ka rem ka jop na ka bynta ki 800 ngut ki kyrtong ki ba iakhun na ki 178 tylli ki seat ha kitei ki laitylli ki jylla yn sa rai lashai ka sngi 2 tarik Lber.
Na ka liang ki bor ba dei khmih ki la shim ia ki sienjam kiba kham kyrpang khamtam ha Tripura bad Nagaland kiba la sakhi ia kiba bun ki jingjia jong ka jingiakynad sain hima ha ka por ba la pynlong ia ka jingiathep vote.Ka Tripura ka la sakhi kham bun ki jingiakynad hadien ba la dep ka jingiathep vote, katba ka Nagaland ka la sakhi kham bun ki jingiakynad hashwa ka jingiathep vote.
Na ka liang u CEO ka Tripura u Kiren Gitte u dang bishar bniah ha kaba iadei bad ka jingpynkhreh ia ki bor pahara khnang ban pynthikna ia ka shongsuk shongsain ha katei ka sngi niew vote.
