Shillong, Lber 01 : U Chief Electoral Officer (CEO) Bah FR Kharkongor, hynne ka sngi Balang, ula hukum ia u District Election Officer (DEO) ka Ri-Bhoi District ban pynlong mardor ia ka jingtohkit halor ka jingkynnoh ba pynkhein ia ka kyndon bym shah shoh dur ha ka port hep vote ha Mawhati constituency bad ban aiti ia ka Action Taken Report (ATR) haph ka 3 tarik u Lber.
Kane kala mih hadien ka jingsaphriang ki dur ha ka rynsan Social Media, kaba pyni ia u nongthep vote ba khnoin ia u budam, haba jied ia u kyrtong ha ka ballot unit, kaba dei ka jingpynkhein ia ka jingthep vote harieh ne bym dei ban paw pyrthei.
Kane ka jingjia kala jia wat hapdeng ka jingbthah bala pynmih ha kaban pynthikna ba ym dei ban shah ia ki nongthep vote ba kin rah ia ki mobile phone shapoh ka jaka thep vote ha ka Polling Station.
U CEO ula ong, haba iadei bad kane ka jingpynkhein kyndon, phi kum u DEO ka Ri-Bhoi phi dei ban phah mardor ia ka jingtohkit ban lah pynshisha ia kane ka jingkynnoh, kaba la mih ha ka 35-Shiliang Umdoh Polling Station jong ka Mawhati Constituency.
U CEO ula bthah ia u DEO ban leh tyngeh pyrshah ia ki Polling Official jong kane ka Polling Station kiba shah ban rah mobile bad shondur hapoh ka kamra thep vote, hadien bala dep tohkit.
“Dei ban ai jingpynsajia pyrshah ia u nongthep vote ula pynkhein ia kane ka kyndon hadien ba dep pynshisha ia ka jingleh jong u” ula ong haba bthah ba dei ban aiti ia ka kaiphod khlem pep ym palat ia ka 3 tarik Lber.
