Guwahati, Lber 01 : Ka jingkhynra ba la pynlong da ka Guwahati Metropolitan Development Authority (GMDA) pyrshah ia kiba shong ba sah beain kaba la sdang naduh ka 27 tarik mynta u bnai ka long ban pyllait ia ka Guwahati na ka jingshlei um bad ban pynioh jingmyntoi ia kumba 15 lak ngut ki nongshong shnong jong kane ka sorbah.
Haduh kumba 3000 ngut ki bor pahara la pynap ha katei ka jaka khnang ban khanglad na kano kano ka jingmih jong ka jingiakynad bad kitei ki nongshong shnong.
Ki don haduh kumba 1800 akar ka jaka ha Silsako Beel, ha kaba 1200 akar ka dei kaba la hap ha ki kti jong ki nongwan kyntur jaka beain.Kito kiba hap hapoh ka 100 mitar hapdeng ka jaka pyniaid ha ki bynta jong ka Silsako Beel haduh Narengi ki la shah kyndang noh ha ka 27 tarik mynta u bnai.
Katto katne na kine ki nongshong shnong ha Silsako Beel ki ju siew khajna bai shong bai sah sha ka Guwahati Municipal Corporation (GMC) mynta lah kumba katto katne snem bad ki don ruh ia u nombor iing ba la ai da ka GMC.
Hynrei watla katta na ka liang u Chairman ka GMDA, u Narayan Deka, u la ong, “Yn ym don kiba lah ban kam ia ki hok halor ka jaka ha ka kyrteng ka jingdon ia u nombor ba la ai da ka GMC.Ka dei tang ka khajna kaba ki ai na ka bynta ban shong ban sah ha ka sorbah Guwahati.Kane ka treikam ruh na ka bynta kito ki briew kiba shong ba sah ha Myadi patta (ki jaka shongneh) bad ki jaka sorkar.Ia ki hok halor ki jaka puta la ai katkum ka revenue policy.”
Katkum ka kaiphot la iohi ba haduh kumba 300 tylli ki longiing jong ki trai shnong rit paid ki la shah kyndang noh ha ryngkat ki artylli ki temple shibynta jong kane ka jingkhynra ba la pynlong da ka sorkar jong u CM Himanta Biswa Sarma pyrshah ia kiba tur sha ki sorkar sorkar hapoh Assam.
Namar kine ki jingkhynra u la don ruh uwei u briew uba pynkut noh iala ka jong ka jingim mynta ka sngi namar ka jingsyier ioh ba ka iingsah ka jong u ruh kan ngat ha ka jingshah pynpra ha kane ka jingwan khynra.Katkum ki khubor la ong ba une u briew u la kynthih nalor ka iing hadien ba u la ioh pdiang ia ka notis ban mih noh na ka sorkar Assam.
