Itanagar, Rymphang 28 :Ha kawei na ki jingkhynra lehnoh kaba seisoh, ki shipai Assam Rifles na ka Khonsa Battalion ha ryngkat ki bor pulit ka Tirap ki la ioh kem ia uwei u dkhot ba ehrang jong ka kynhun kieng atiar NSCN (IM) ha ka 27 tarik mynta u bnai na ki bynta jong ka Tirap district ka Arunachal Pradesh.
Ki shipai ka Assam Rifles ha ryngkat ki bor pulit ki la ioh ban kem noh ia utei u ehrang hadien ba ki la ioh ia ka jingtip kaba bniah ha kaba iadei bad ka jingwan rung jong uwei u lehnoh sha ki bynta jong ka shnong Noglo kaba hapoh Tirap district.
“Hadien ba la ioh ia ka jingtip kaba bniah ki bor shipai bad pulit ki la pynlong ka jingkhynra ha ka shnong Noglo, bad ha kane ka jingkhynra la ioh ban kem noh ia uwei u ehrang ha ryngkat ka tiar siat, kata katba u dang pyrshang ban phet krad,” ong u heh pulit.
Ia une u ehrang ka NSCN(IM) uba la shah kem noh la tip kyrteng kum u Nali Homnyu Nyamtey uba dei na ka shnong Noglo hapoh Tirap district ka jylla.
La ioh jingtip ba une u ehrang u la wan napoh Myanmar da ka jingthmu ban dawa pisa pisa bad ban leh ia kiwei pat ki kam pyntriem hapoh ki shnong kiba don ha khappud ka India bad Myanmar.
“Une u ehrang la ong ruh ba u dei uba donkti ha kaba byrthen byrsit ia ki trai shnong bad ia ki nongialam shnong ha Noglo bad ha Laju circle jong ka Tirap district, kata ban wanrah ka jingshong syier hapoh ka thain,” ong ka khubor pulit.
Kumta ruh la ong ba ka jingioh kem ia une u ehrang jong katei ka kynhun kieng atiar ka la long kawei na ki jingjop kaba khraw na ka bynta ki bor pahara.
